കൊച്ചി: കളമശേരിയിലെ കൂട്ട ബലാത്സംഗ കേസിൽ കൂടുതൽ വിവരങ്ങൾ പുറത്ത്. ജോലി നൽകാമെന്ന് വാഗ്ദാനം ചെയ്‌ത് വിളിച്ചുവരുത്തിയ വിവാഹിതയായ സ്ത്രീയെ പീഡിപ്പിച്ച സംഭവത്തിൽ രണ്ട് പേർ കഴിഞ്ഞ ദിവസം അറസ്റ്റിലായിരുന്നു. കേസിലെ മുഖ്യ പ്രതിയായ യുവതി അടക്കമുള്ളവർക്കായി പൊലീസ് തിരച്ചിൽ നടത്തി വരികയാണ്.
അതിക്രമത്തിനിരയായ യുവതി നേരിട്ടത് കൊടിയ മര്‍ദനവും പീഡനവുമാണെന്ന് ഭര്‍ത്താവ് വെളിപ്പെടുത്തി. ക്രൂരതയ്ക്ക് നേതൃത്വം നല്‍കിയത് സംഘത്തിലുണ്ടായിരുന്ന സ്ത്രീയാണെന്നും, കടുത്ത ശാരീരിക-മാനസിക ആഘാത നേരിടുന്ന യുവതി നിലവില്‍ കളമശേരി മെഡിക്കല്‍ കോളജ് ആശുപത്രിയില്‍ ചികിത്സയിലാണെന്നും അദ്ദേഹം പറഞ്ഞു.
സ്പായുടെ മറവില്‍ സ്ത്രീകളെ കെണിയില്‍പ്പെടുത്തി സെക്‌സ് റാക്കറ്റിന്‍റെ ഭാഗമാക്കുന്ന വന്‍ സംഘമാണ് സംഭവത്തിന് പിന്നില്‍ പ്രവര്‍ത്തിച്ചതെന്നാണ് പൊലീസ് സംശയിക്കുന്നത്. കേസിലെ ഒന്നാം പ്രതിയും സ്പാ നടത്തിപ്പുകാരനുമായ ആലപ്പുഴ കാര്‍ത്തികപ്പിള്ളി സ്വദേശി ശ്രീരാജ്, നാലാം പ്രതി തൃക്കാക്കര സ്വദേശി ജിത്ത് മാര്‍ട്ടിന്‍ എന്നിവരെ പൊലീസ് അറസ്റ്റ് ചെയ്തു.
കേസില്‍ ഒളിവിലുള്ള രണ്ടാം പ്രതി വയനാട് സ്വദേശി അമ്മു, മൂന്നാം പ്രതി സഞ്ജു എന്നിവര്‍ക്കായി തെരച്ചില്‍ ഊര്‍ജിതമാക്കിയിട്ടുണ്ട്. മുമ്പ് അധ്യാപികയായി ജോലി ചെയ്തിരുന്ന യുവതി, ജോലി നഷ്ടപ്പെട്ടതിനെ തുടര്‍ന്ന് പുതിയ അവസരങ്ങള്‍ അന്വേഷിക്കുന്നതിനിടെയാണ് ഒ.എല്‍.എക്‌സില്‍ സ്പാ മാനേജര്‍ ഒഴിവുണ്ടെന്ന പരസ്യം കാണുന്നത്. ഇന്‍റര്‍വ്യൂവിന് പോയ യുവതിക്ക് ജോലി ലഭിച്ചതായും അറിയിച്ചിരുന്നു. എന്നാല്‍ തുടര്‍ന്ന് ഇന്‍റര്‍വ്യൂ സമയം മാനേജരെന്ന് പരിചയപ്പെടുത്തിയ യുവതി വീണ്ടും വിളിച്ചതിനെ തുടര്‍ന്നാണ് യുവതി ഇവിടേക്ക് പോയത്.
അവിടെയെത്തിയ യുവതിക്ക് പ്രതികള്‍ ലഹരി കലര്‍ത്തിയ ഐസ്‌ക്രീമും ബിയറും നല്‍കി ബോധം കെടുത്തിയ ശേഷമായിരുന്നു കൂട്ടബലാത്സംഗം ഇരയാക്കിയത്. പിറ്റേന്ന് രാവിലെ ബോധം വന്നപ്പോഴാണ് താന്‍ നേരിട്ട ദാരുണാവസ്ഥ യുവതി തിരിച്ചറിയുന്നത്. രക്ഷപെടാന്‍ ശ്രമിച്ചെങ്കിലും പ്രതികള്‍ വീണ്ടും ഉപദ്രവിക്കുകയും, ദൃശ്യങ്ങള്‍ പകര്‍ത്തി പുറത്തുപറഞ്ഞാല്‍ കൊല്ലുമെന്ന് ഭീഷണിപ്പെടുത്തുകയും ചെയ്തു.
വൈകുന്നേരത്തോടെ കൂടുതല്‍ ആളുകള്‍ മുറിയിലേക്ക് എത്തിയതോടെ, ബിയര്‍ കുപ്പി തല്ലിപ്പൊട്ടിച്ച് സ്വയം കുത്തി ആത്മഹത്യ ചെയ്യുമെന്ന് യുവതി ഭീഷണി മുഴക്കിയതോടെയാണ് സംഘം വിട്ടയയ്ക്കാന്‍ തയ്യാറായത്. വീട്ടിലെത്തിയ യുവതിയുടെ മുഖത്തിന്‍റെ ഇരുവശങ്ങളും വീര്‍ത്ത നിലയിലും മുറിവുകളോടെയുമായിരുന്നു കണ്ടത്. തുടര്‍ന്ന് ഭര്‍ത്താവ് നിര്‍ബന്ധിച്ചു ചോദിച്ചപ്പോഴാണ് നേരിട്ട ക്രൂരതകള്‍ വെളിപ്പെടുത്തിയത്.
Join Our Whats App group
Post A Comment: