ഇന്ത്യയുടെ രണ്ടാം ചാന്ദ്ര ദൗത്യമായ ചന്ദ്രയാൻ-2 കുതിക്കുമ്പോൾ നാസയുടെ ശാസ്ത്രോപകരണവും അതിൽ ഉൾപ്പെടുത്തും. അടുത്തമാസമാണ് ചന്ദ്രയാൻ-2 വിക്ഷേപിക്കുന്നത്. നാസ വികസിപ്പിച്ച ലേസര് റിട്രോ റിഫ്ലക്ടറുകളാണ് ചന്ദ്രയാന് 2-ല് ഘടിപ്പിക്കുക. ചന്ദ്രനിലേക്കുള്ള കൃത്യമായ അകലം കണക്കാക്കുന്നതിന് ഗവേഷകരെ സഹായിക്കുന്ന ഉപകരണങ്ങളാണ് ഇവ. അമേരിക്കയിലെ ടെക്സസില് നടന്ന ലൂണാര് ആന്ഡ് പ്ലാനിറ്ററി സയന്സ് കോണ്ഫറന്സിനിടെയാണ് നാസ അധികൃതര് ഇക്കാര്യം വെളിപ്പെടുത്തിയതെന്ന് സ്പേസ് ഡോട്ട് കോം റിപ്പോര്ട്ട് ചെയ്തു.
ചന്ദ്രന്റെ ഉപരിതലത്തിലുടനീളം ലേസര് റിട്രോ റിഫ്ലക്ടറുകള് വിന്യസിക്കാനാണ് നാസയുടെ പദ്ധതി. പ്രത്യേകതരം കണ്ണാടികളാണ് ഇവ. ഭൂമിയില്നിന്നും ലേസര് രശ്മി ചന്ദ്രനിലേക്ക് അയയ്ക്കുകയും റിട്രോ റിഫ്ലക്ടറുകളില് തട്ടി പ്രതിഫലിക്കുന്ന പ്രകാശം പഠനവിധേയമാക്കുകയുമാണ് ചെയ്യുക. ഇതിലൂടെ പേടകം എവിടെയാണുള്ളതെന്ന് കൃത്യമായി കണക്കുകൂട്ടാം. ഭൂമിയുംചന്ദ്രനും തമ്മിലുള്ള അകലവും മനസ്സിലാക്കാം.
3,890 കിലോഗ്രാം ഭാരമുള്ള ചന്ദ്രയാന് 2 ഏപ്രിലില് ജി.എസ്.എല്.വി.-എം.കെ. 3 റോക്കറ്റിലാണ് വിക്ഷേപിക്കുക. 800 കോടി രൂപയാണ് പദ്ധതിച്ചെലവ്. ചന്ദ്രയാന് 2 ചന്ദ്രനിലിറങ്ങുന്നതോടെ ആ നേട്ടം കരസ്ഥമാക്കുന്ന അഞ്ചാമത്തെ രാജ്യമായി ഇന്ത്യമാറും.
Post A Comment: