ഇടുക്കി: അയ്യപ്പൻകോവിൽ ആലടിക്കുന്നിൽ വയോധികയെ വീടിനുള്ളിലെ അടുക്കളയിൽ കത്തിക്കരിഞ്ഞു മരിച്ച നിലയിൽ കണ്ടെത്തിയ സംഭവത്തിൽ അന്വേഷണം തുടരുന്നു.
ആലടിക്കുന്ന് മൈലക്കല് പരേതനായ ജോസഫിന്റെ ഭാര്യ മേരിക്കുട്ടി ജോസഫാണ് (69) മരിച്ചത്. ഞായറാഴ്ച്ച രാത്രി ഒൻപതോടെ മകൻ ജെയ്സൺ ജോലി കഴിഞ്ഞ് മടങ്ങിയെത്തിയപ്പോഴാണ് വീടിനുള്ളിൽ മേരിക്കുട്ടിയെ കത്തിക്കരിഞ്ഞ നിലയിൽ കണ്ടത്.
അടുക്കളയിലാണ് ഇവരെ കണ്ടത്. ഇവിടെ ഉപകരണങ്ങളും കത്തിക്കരിഞ്ഞ നിലയിലായിരുന്നു. തുടർന്ന് ഉപ്പുതറ പൊലീസ് സ്ഥലത്തെത്തി നടത്തിയ അന്വേഷണത്തിൽ അടുപ്പിൽ തീ പകരുന്നതിനിടെ വസ്ത്രത്തിലേക്ക് തീ പടർന്നതാണ് അപകട കാരണമെന്നാണ് വിലയിരുത്തപ്പെടുന്നത്.
ശാരീരികമായി ചില രോഗങ്ങൾ അലട്ടിയിരുന്ന മേരിക്കുട്ടി സംഭവ ദിവസം വൈകിട്ട് സമീപത്തെ വീട്ടിൽ പോയി മടങ്ങി വന്നശേഷമാണ് അപകടം നടന്നതെന്നാണ് കരുതുന്നത്. മേരിക്കുട്ടിയും മകന് ജെയ്സണും മാത്രമാണ് വീട്ടില് താമസിച്ചിരുന്നത്.
ഫോറന്സിക് വിദഗ്ദ്ധരും പൊലീസ് നായും സ്ഥലത്തെത്തി പരിശോധന നടത്തിയെങ്കിലും അസ്വാഭാവികമായി ഒന്നും കണ്ടെത്തിയിട്ടില്ല. സംസ്കാരം നടത്തി. ജൂലിയ ജോസഫ്, ജയ്മോള് ജോസഫ് എന്നിവരാണ് മറ്റ് മക്കള്. മരുമക്കള്: ഷാജി, റോയി.
Join Our Whats App group
Post A Comment: