ബെയ്ജീങ്ങ്: കാമുകനിൽ നിന്നും പ്രായം മറച്ചു വയ്ക്കാൻ വ്യാജ പാസ് പോർട്ട് സംഘടിപ്പിച്ച യുവതി കുടുങ്ങി. വ്യാജ പാസ് പോർട്ടുമായി കാമുകനൊപ്പം വിമാന യാത്രക്കെത്തിയ യുവതിയാണ് വിമാനത്താവളത്തിൽ പിടിക്കപ്പെട്ടത്.
കാമുകനെക്കാൾ 17 വയസാണ് യുവതിക്ക് പ്രായ വ്യത്യാസം. ചൈനയിലാണ് സംഭവം നടന്നത്. രണ്ട് പാസ്പോര്ട്ടുകളാണ് ഇവരുടെ കൈവശമുണ്ടായിരുന്നത്. ഒന്നില് ജനന വര്ഷം 1982 എന്നും അടുത്തതില് 1996 എന്നും രേഖപ്പെടുത്തിയിരുന്നതായി റിപ്പോര്ട്ട് പറയുന്നു.
41 വയസുകാരി തന്റെ പ്രായം 27 വയസാണെന്ന് കാമുകനെ ബോധ്യപ്പെടുത്താന് വേണ്ടിയാണത്രെ വ്യാജ പാസ്പോര്ട്ട് തയ്യാറാക്കിയത്. കാമുകനാവട്ടെ 24 വയസ് മാത്രമാണ് പ്രായം. പ്രണയ ബന്ധത്തെ ബാധിക്കാതിരിക്കാനാണ് യഥാർഥ വയസ് മറച്ചുവെച്ചതെന്ന് സ്ത്രീ ഉദ്യോഗസ്ഥരോട് പറഞ്ഞു.
കഴിഞ്ഞ ദിവസം ജപ്പാനിലേക്ക് യാത്ര ചെയ്യാനാണ് കാമുകനൊപ്പം ഇവര് ബെയ്ജിങ് വിമാനത്താവളത്തില് എത്തിയത്. പരിശോധനയ്ക്കായി വ്യാജ പാസ്പോര്ട്ട് ഉദ്യോഗസ്ഥര്ക്ക് കൊടുത്തു. ഇതില് അസ്വഭാവികത തോന്നിയ ഉദ്യോഗസ്ഥര് മറ്റ് രേഖകള് ആവശ്യപ്പെട്ടതോടെ ഇവര് പരിഭ്രാന്തരായി.
ഉദ്യോഗസ്ഥന്റെ കൈയില് നിന്ന് പാസ്പോര്ട്ട് പിടിച്ചുവാങ്ങാന് ശ്രമിക്കുകയും കാര്യം രഹസ്യമാക്കി വെയ്ക്കണമെന്ന് നിര്ദേശിക്കുകയും ചെയ്തു. ഒപ്പമുണ്ടായിരുന്ന കാമുകനോട് ചെക് പോയിന്റിലേക്ക് നീങ്ങിക്കൊള്ളാനും നിര്ദേശിച്ചു.
എന്നാല് ഉദ്യോഗസ്ഥര് ചോദ്യം ചെയ്തപ്പോള് 900 ഡോളര് ചിലവാക്കി വ്യാജ പാസ്പോര്ട്ട് സംഘടിപ്പിച്ചുവെന്ന് ഇവര് സമ്മതിച്ചു. ജനന തീയ്യതി തിരുത്തി 1996 എന്ന് രേഖപ്പെടുത്തിയ പാസ്പോര്ട്ടാണ് വ്യാജമായി ഉണ്ടാക്കിയത്.
എമിഗ്രേഷന് ഉദ്യോഗസ്ഥര് ചോദ്യം ചെയ്തപ്പോള് താന് ജനന തീയ്യതി മാത്രമേ മാറ്റിയുള്ളു എന്നും വാദിച്ചത്രെ. സ്ത്രീയില് നിന്ന് 3000 യുവാന് പിഴ ഈടാക്കുകയും വ്യാജ പാസ്പോര്ട്ട് പിടിച്ചെടുക്കുകയും ചെയ്തതായി റിപ്പോര്ട്ട് പറയുന്നു.
വാട്സാപ്പ് ഗ്രൂപ്പിൽ അംഗമാകുവാൻ
https://chat.whatsapp.com/JADaOBrSTxqKfsrW1ZkLRV
Post A Comment: