ഇടുക്കി: മൂന്നാറിൽ വിനോദ സഞ്ചാരത്തിനെത്തിയ യുവതിയെ തടഞ്ഞുവച്ച് ഭീഷണിപ്പെടുത്തിയ സംഭവത്തിൽ രണ്ട് ടാക്സി ഡ്രൈവർമാർ അറസ്റ്റിൽ. മൂന്നാര് സ്വദേശികളായ വിനായകന്, വിജയകുമാര് എന്നിവരാണ് പിടിയിലായത്.
മുംബൈയില് അസിസ്റ്റന്റ് പ്രൊഫസറായ ജാന്വി എന്ന യുവതി മൂന്നാര് സന്ദര്ശിക്കാന് എത്തിയിരുന്നു. സന്ദര്ശന വേളയില് ഓണ്ലൈന് ടാക്സിയില് യാത്ര ചെയ്തപ്പോഴാണ് പ്രദേശവാസികളായ ടാക്സി ഡ്രൈവര്മാരില് നിന്നും യുവതിക്ക് ദുരനുഭവമുണ്ടായത്.
ഒക്ടോബര് 31 ന് തന്റെ ഇന്സ്റ്റഗ്രാം അക്കൗണ്ടിലൂടെയാണ് യുവതി ദുരനുഭവം പങ്കുവച്ചത്. ഓണ്ലൈനായി ബുക്ക് ചെയ്ത ടാക്സിയില് കൊച്ചിയും ആലപ്പുഴയും സന്ദര്ശിച്ച ശേഷമാണ് ജാന്വിയും സുഹൃത്തുക്കളും മൂന്നാറിലെത്തിയത്. മൂന്നാറില് ഓണ്ലൈന് ടാക്സികള്ക്ക് നിരോധനമാണെന്ന് പറഞ്ഞ് ഡ്രൈവര്മാര് ഇവരെ തടയുകയായിരുന്നു.
സ്ഥലത്തെ ടാക്സി വാഹനത്തില് മാത്രമേ പോകാന് അനുവദിക്കുകയുള്ളൂവെന്ന് ഇവര് ഭീഷണിപ്പെടുത്തിയതോടെ യുവതി പൊലീസിന്റെ സഹായം തേടി. എന്നാല് സ്ഥലത്തെത്തിയ പൊലീസ് ഉദ്യോഗസ്ഥരും ഇതേ നിലപാട് സ്വീകരിക്കുകയായിരുന്നു.
ഇതോടെ മറ്റൊരു ടാക്സി വാഹനത്തില് യാത്ര ചെയ്യേണ്ടി വന്നെന്നും സുരക്ഷിതമല്ലെന്നു കണ്ടു കേരളയാത്ര അവസാനിപ്പിച്ചു മടങ്ങിയെന്നും ജാന്വി പറഞ്ഞിരുന്നു. വീഡിയോ ചര്ച്ചയായതിന് പിന്നാലെ രണ്ട് പൊലീസുകാരെ സസ്പെന്ഡ് ചെയ്തിരുന്നു. എഎസ്ഐ സാജു പൗലോസിനും ഗ്രേഡ് എസ്ഐ ജോര്ജ് കുര്യനുമെതിരെയാണ് നടപടിയെടുത്തത്.
Join Our Whats App group
https://chat.whatsapp.com/JADaOBrSTxqKfsrW1ZkLRV
Post A Comment: