ഇടുക്കി: കനത്ത മഴയിൽ മരം ഒടിഞ്ഞു വീണ് സ്‌കൂൾ വിദ്യാർഥികൾ അടക്കം നാല് പേർക്ക് പരുക്ക്. വണ്ടിപ്പെരിയാറിൽ മഞ്ജുമല വില്ലേജ് ഓഫീസിന് സമീപം വെള്ളിയാഴ്ച്ച വൈകിട്ട് അഞ്ചോടെയാണ് കൂറ്റൻമരം ഒടിഞ്ഞു വീണത്. സ്‌കൂൾ വിട്ട് കുട്ടികൾ വരുന്ന സമയത്താണ് റോഡിലേക്ക് മരം പതിച്ചത്.
മൂന്ന് വിദ്യാർഥികൾക്കും മറ്റൊരാൾക്കും അപകടത്തിൽ പരുക്കേറ്റു. പ്ലസ് ടു വിദ്യാര്‍ഥികളായ ഗോകുല്‍ ഹരി, ഹയസ് എന്നിവർക്കാണ് പരുക്കേറ്റത്. മറ്റൊരു ബൈക്ക് യാത്രികനും പരുക്കേറ്റിട്ടുണ്ട്.
ഉച്ചയ്ക്ക് ശേഷം വണ്ടിപ്പെരിയാർ പ്രദേശത്ത് കനത്ത മഴയാണ് അനുഭവപ്പെട്ടത്. ഇതിനിടെയാണ് അഞ്ചോടെ മരം ഒടിഞ്ഞു വീണത്. പഞ്ചായത്ത് ഹയര്‍ സെക്കന്‍ഡറി സ്‌കൂളിലെയും ഗവ. യു.പി സ്‌കൂളിലെയും കുട്ടികള്‍ സ്‌കൂളു കഴിഞ്ഞ് വീട്ടിലേക്ക് പോകുന്ന സമയത്താണ് അപകടമുണ്ടായത്.
മരം വീണ് ഓട്ടോറിക്ഷയും രണ്ട് ബൈക്കുകളും തകർന്നു. അപകടത്തെ തുടര്‍ന്ന് അരമണിക്കൂറോളം ഗതാഗതം പൂര്‍ണമായും തടസപ്പെട്ടു. പിന്നീട് നാട്ടുകാര്‍ തന്നെയാണ് റോഡിലേക്ക് മറിഞ്ഞു കിടന്ന മരം വെട്ടി മാറ്റി ഗതാഗതം പുനര്‍ സ്ഥാപിച്ചത്. പീരുമേട് ഫയര്‍ഫോഴ്‌സ്, വണ്ടിപ്പെരിയാര്‍ പൊലീസ് എന്നിവര്‍ സ്ഥലത്തെത്തി മേല്‍ നടപടികള്‍ സ്വീകരിച്ചു.
Join Our Whats App group
https://chat.whatsapp.com/DnZkuEEgZHP5lo60i9Xm4L
Post A Comment: