ഹൃദയാഘാതം; ശരീരം തരുന്ന ഈ മുന്നറിയിപ്പുകൾ അവഗണിക്കരുത്

യുവാക്കൾക്കിടയിൽ പോലും ഹൃദ്രോഗം വർധിച്ചു വരുന്ന കാലഘട്ടമാണിത്. ജീവിത ശൈലിയും മാറുന്ന ഭക്ഷണ രീതിയുമൊക്കെ ഇതിനു കാരണമാകുന്നുണ്ട്.  

അശ്രദ്ധ തന്നെയാണ് ഇക്കാര്യത്തിൽ പലപ്പോഴും വില്ലനാകുന്നതും. ശരീരം കാണിക്കുന്ന ലക്ഷണങ്ങൾ അവഗണിക്കുന്നതാണ് പലപ്പോഴും ഹൃദ്രോഗം മൂർഛിക്കാൻ കാരണമാകുന്നത്. 

60 വയസിന് മുകളിലുള്ളവരിൽ ഹൃദയാഘാത സൂചന നൽകുന്ന പല മുന്നറിയിപ്പുകളുമുണ്ട്. അത് കൊണ്ട് ശരീരത്തെ അൽപം ശ്രദ്ധിക്കുന്നത് ജീവൻ തിരിച്ചു പിടിക്കാൻ പോലും സഹായിക്കും. 

ഹൃദയ പേശികൾക്ക് ആവശ്യത്തിന് രക്തം ലഭിക്കാതെ വരുമ്പോഴാണ് മയോകാർഡിയൽ ഇൻഫ്രാക്ഷൻ എന്നറിയപ്പെടുന്ന ഹൃദയാഘാതം സംഭവിക്കുന്നത്. 

കൊറോണറി ആർട്ടറി ഡിസീസ് ആണ് ഹൃദയാഘാതത്തിന്‍റെ പ്രധാന കാരണം. ഹൃദയ ധമനികൾക്ക് ആവശ്യമായ രക്തവും ഓക്‌സിജനും പോഷകങ്ങളും ഹൃദയത്തിലേക്ക് നൽകാൻ കഴിയാതെ വരുന്ന അവസ്ഥയാണിത്. 

നെഞ്ചിലെ അസ്വസ്ഥത അല്ലെങ്കിൽ നെഞ്ചുവേദനയാണ് പ്രധാന മുന്നറിയിപ്പുകളിലൊന്ന്. അറുപത് കഴിഞ്ഞവർക്ക് ഹൃദയസംബന്ധമായ അസുഖങ്ങൾക്കുള്ള സാധ്യത കൂടുതലാണ്. താടിയെല്ലിനും പൊക്കിളിനുമിടയിൽ അനുഭവപ്പെടുന്ന ഏതൊരു വേദനയും ഹൃദയസംബന്ധമായ അസുഖത്തിന്‍റെ ലക്ഷണമാണ്. 

സമയം കഴിയുന്തോറും അല്ലെങ്കിൽ എന്തെങ്കിലും പ്രവർത്തികളിലേർപ്പെടുമ്പോൾ ഈ വേദന വർധിച്ചേക്കാം. ചിലരിൽ വിയർപ്പ്, ഓക്കാനം, തലകറക്കം പോലെയുള്ള മറ്റെന്തെങ്കിലും ലക്ഷണങ്ങളും ഉണ്ടാകും. 

സാധാരണ വളരെ നന്നായി ചെയ്‌തുകൊണ്ടിരുന്ന കാര്യങ്ങൾ ശ്വാസമെടുക്കാൻ ബുദ്ധിമുട്ട് അനുഭവപ്പെടുന്നത് കൊണ്ടുമാത്രം ചെയ്യാൻ കഴിയാത്ത അവസ്ഥയിലേക്കെത്തുന്നതും ഹൃദയസംബന്ധമായ ബുദ്ധിമുട്ടുകൾ കൊണ്ടാണ്. 

ഓടുന്നതിനും പടികൾ കയറുന്നതിനു എല്ലാം ബുദ്ധിമുട്ട് തോന്നാം. ഇത് മൂലം ബോധം നഷ്ടപ്പെടാൻ പോലും സാധ്യതയുണ്ട്. മറ്റൊരു ലക്ഷണവുമില്ലാതെ തലകറങ്ങി വീഴുന്നതും ഹൃദയ സംബന്ധമായ പ്രശ്‌നങ്ങൾ മൂലമാകാം.