കൊച്ചി: തിരുമ്മൽ കേന്ദ്രങ്ങളുടെ മറവിൽ അനാശാസ്യം നടക്കുന്നതായി രഹസ്യ വിവരം ലഭിച്ചതിനെ തുടർന്ന് കൊച്ചിയിലെ ചില തിരുമ്മൽ കേന്ദ്രങ്ങളിൽ പൊലീസിന്‍റെ മിന്നൽ പരിശോധന. നോർത്ത് പൊലീസിന്‍റെ നേതൃത്വത്തിലാണ് ലിസി മെട്രൊ സ്റ്റേഷന് സമീപമുള്ള ലാക്മി സ്പാ, ആസാദ് റോഡിലുള്ള ആയുരാരോഗ്യ സ്പാ എന്നിവിടങ്ങളിൽ പരിശോധന നടത്തിയത്. ലാക്മി സ്പായിൽ നടത്തിയ പരിശോധനയിൽ റെയ്ഡ് നടത്തിയ സമയം ജീവനക്കാരായ പുരുഷന്മാരും സ്ത്രീകളുമാമ് സ്ഥാപനത്തിൽ ഉണ്ടായിരുന്നത്.
സ്ഥാപനത്തിന് യാതൊരുവിധ ലൈസൻസും ഉണ്ടായിരുന്നില്ല. സ്ഥാപനത്തിൽ തെറാപ്പിസ്റ്റ് ആയി ജോലി ചെയ്യുന്ന സ്ത്രീകൾക്കും പുരുഷന്മാർക്കും യാതൊരുവിധ സർട്ടിഫിക്കറ്റുകളും ഇല്ലെന്നും കണ്ടെത്തി. സ്ഥാപനം താൽകാലികമായി നിർത്താൻ പൊലീസ് നോട്ടീസ് നൽകി. ആസാദ് റോഡിലുള്ള ആയുർ ആരോഗ്യ സ്പാ റെയ്‌ഡിനെത്തിയപ്പോൾ പൂട്ടിയ നിലയിലായിരുന്നു.
തിരുമ്മൽ കേന്ദ്രങ്ങളുടെ മറവിൽ അനാശാസ്യ പ്രവർത്തനങ്ങൾ നടത്തുവാൻ അനുവദിക്കില്ലെന്നും അത്തരത്തിലുള്ള സ്ഥാപനങ്ങൾക്കെതിരെ ശക്തമായ നടപടി സ്വീകരിക്കുമെന്നും വരും ദിവസങ്ങളിലും റെയ്ഡ് തുടരുമെന്നും എറണാകുളം അസിസ്റ്റന്‍റ് കമ്മീഷണർ കെ. ലാൽജി അറിയിച്ചു. നോർത്ത് ഇൻസ്പെക്ടർ സിബി ടോം, സബ് ഇൻസ്പെക്ടർ അനസ്, വനിത സബ് ഇൻസ്പെക്ടർ ശരണ്യ, സി.പി.ഒ. ലിബിൻ രാജ്, പ്രവീൺ എന്നിവരുടെ നേതൃത്വത്തിലായിരുന്നു പരിശോധന.
വാട്സാപ്പ് ഗ്രൂപ്പിൽ അംഗമാകുവാൻ ഈ ലിങ്ക് ക്ലിക്ക് ചെയ്യുമല്ലോ..
Post A Comment: