മലപ്പുറം: ചുവരിൽ തറച്ച ആണിയിൽ ഷർട്ടിന്‍റെ കോളർ കുരുങ്ങി 11 കാരൻ മരിച്ചു. വള്ളിക്കാഞ്ഞിരം സ്വദേശി കിഴക്കേവളപ്പിൽ മണികണ്ഠൻ, ദിവ്യ ദമ്പതികളുടെ മകൻ ദ്വനിത് (11) ആണ് മരിച്ചത്. വെള്ളിയാഴ്ച്ചയാണ് അപകടം ഉണ്ടായത്.
കിടപ്പുമുറിയുടെ ചുവരിൽ തറച്ച ആണിയിൽ ഷർട്ടിന്‍റെ കോളർ കുരുങ്ങുകയായിരുന്നു. ഷർട്ട് കഴുത്തിൽ മുറുകിയതോടെ ശ്വാസം മുട്ടിയാണ് കുട്ടി മരിച്ചത്. നിറമരുതൂര്‍ ഗവ.യു.പി സ്‌കൂളിലെ ആറാം ക്ലാസ് വിദ്യാര്‍ഥിയാണ് ധ്വനിത്.
കുട്ടിയുടെ നിലവിളി കേട്ട് ഓടിയെത്തിയ അച്ഛന്‍ മണികണ്ഠനാണ് ആണിയില്‍ ഷര്‍ട്ട് കുരുങ്ങിയ നിലയില്‍ ധ്വനിതിനെ ആദ്യം കണ്ടത്. കഴുത്തില്‍ ഷര്‍ട്ട് വലിഞ്ഞ് ശ്വാസം കിട്ടാത്ത നിലയിലായിരുന്നു കുട്ടി ഉണ്ടായിരുന്നത്.
ഉടന്‍ തന്നെ കുട്ടിയെ തിരൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. പ്രാഥമിക ചികിത്സക്ക് ശേഷം കോഴിക്കോട് സ്വകാര്യ ആശുപത്രിയിലേക്കും പിന്നീട് കോഴിക്കോട് മെഡിക്കല്‍ കോളെജിലേക്കും മാറ്റി.
ഇവിടെ ചികിത്സയില്‍ കഴിയവെ ശനിയാഴ്ച വൈകിട്ടോടെയാണ് മരണം സംഭവിക്കുന്നത്. മൃതദേഹം പോസ്റ്റുമോര്‍ട്ടത്തിന് ശേഷം തിരൂര്‍ പൊറ്റിലത്തറ ശ്മശാനത്തില്‍ സംസ്‌കരിച്ചു.
Join Our Whats App group
Post A Comment: