ഹൈദരാബാദ്: തെലുങ്ക് മെഗാ സ്റ്റാർ ചിരഞ്ജീവിയുടെ ബിഗ്ബജറ്റ് സിനിമാ സെറ്റിൽ വൻ തീപിടുത്തം. മൂന്നു കോടിയുടെ നഷ്ടമുണ്ടായതായാണ് പ്രാഥമിക വിലയിരുത്തൽ. നഷ്ടം ഇനിയും ഉയരുമെന്നാണ് പുറത്തു വരുന്ന റിപ്പോർട്ട്. യുദ്ധം പ്രമേയമാക്കി തയാറാക്കുന്ന സേ രാ നരസിംഹ റെഡി എന്ന ചിത്രത്തിന്റെ സെറ്റിലാണ് അപ്രതീക്ഷിതമായി വൻ തീപിടുത്തമുണ്ടായത്. ആളപായം റിപ്പോർട്ട് ചെയ്തിട്ടില്ല.
ചിത്രത്തിന്റെ ഷൂട്ടിങിനായി ചിരഞ്ജീവിയുടെ കോകാപേട്ടിലെ ഫാംഹൗസിലാണ് ചരിത്ര കോട്ട നിർമിച്ചത്. വ്യാഴാഴ്ച രാത്രി വരെ ഇവിടെ ഷൂട്ടിങ് നടന്നിരുന്നു. ഇന്ന് പുലർച്ചെ അഞ്ചുമണിയോടെയാണ് തീപിടുത്തമുണ്ടായത്. പുക ഉയരുന്നത് കണ്ട് നാട്ടുകാരാണ് സിനിമാ അണിയറപ്രവർത്തകരെ വിവരം അറിയിച്ചത്. ഇതിനകം തീ സെറ്റിലാകെ പടർന്നിരുന്നു. സെറ്റിലെ ഉപകരണങ്ങളാകെ കത്തിനശിച്ചു.
ഷോർട്ട് സർക്യൂട്ടാണ് തീപിടുത്തത്തിനു കാരണമെന്നാണ് വിലയിരുത്തൽ. ഇത് രണ്ടാം തവണയാണ് ഈ ചിത്രത്തിന്റെ സെറ്റിൽ തീപിടുത്തം ഉണ്ടാകുന്നത്. 2017 നവംബറിൽ അന്നപൂർണ സ്റ്റുഡിയോയിൽ ഇട്ട സെറ്റിന് തീപിടിച്ച് രണ്ട് കോടിയുടെ നാശനഷ്ടം ഉണ്ടായിരുന്നു. ഇതേത്തുടർന്ന് ചിത്രീകരണം വൈകുകയായിരുന്നു. സുരേന്ദർ റെഡ്ഡിയാണ് സേ രാ നരസിംഹറെഡ്ഡി എന്ന ബ്രഹ്മാണ്ഡ ചരിത്ര യുദ്ധസിനിമ സംവിധാനം ചെയ്യുന്നത്. കിച്ച സുദീപ്, വിജയ് സേതുപതി, ജഗപതിബാബു, തമന്ന തുടങ്ങിയവർ ചിത്രത്തിൽ അഭിനയിക്കുന്നു.
Post A Comment: