കൊച്ചി: കാലുകളാണ് ഇപ്പോൾ സോഷ്യൽ മീഡിയയിലെ താരം. നടി അനശ്വര രാജനെതിരെ ഉയർന്ന വിമർശനം സിനിമാ ലോകം ഏറ്റെടുത്തതോടെയാണ് സോഷ്യൽ മീഡിയ കാലുകൾ കൊണ്ട് നിറഞ്ഞത്. ഒരു ഫോട്ടോഷൂട്ടിന്‍റെ ഭാഗമായി അനശ്വര സോഷ്യൽ മീഡിയയിൽ പങ്കുവച്ച ചിത്രമായിരുന്നു സംഭവങ്ങളുടെ തുടക്കം. പതിനെട്ടു വയസു തികയാൻ കാത്തിരിയ്ക്കുകയായിരുന്നോ ഇറക്കം കുറഞ്ഞ വസ്ത്രങ്ങൾ ധരിക്കാൻ എന്നെല്ലാം പറഞ്ഞുകൊണ്ടായിരുന്നു അനശ്വരയ്ക്കെതിരെ കമന്‍റുകൾ നിറഞ്ഞത്.
അനശ്വരയ്ക്ക് നേരെ നടന്ന സൈബർ പോരാട്ടത്തിനെതിരെയാണ് സിനിമാ ലോകം അണിനിരന്നത്. ഒട്ടേറെ നടിമാർ ഇതിനു പിന്നാലെ തങ്ങളുടെ കാലുകളുടെ ഭംഗി കാണുന്ന തരത്തിലുള്ള ഫോട്ടോകൾ സോഷ്യൽ മീഡിയിൽ പങ്കുവച്ചു. അന്ന ബെൻ, നയൻതാര ചക്രവർത്തി, എസ്തർ, രജിഷ വിജയൻ, അമേയ, തുടങ്ങി നിരവധിപേരാണ് വിഷയത്തിൽ പിന്തുണ അറിയിച്ച് രംഗത്തെത്തിയത്.
റിമ കല്ലിങ്കൽ മുന്നോട്ട് വച്ച ക്യാംപെയ്ൻ ഏറ്റെടുത്ത് കാൽമുട്ട് വരെ ഇറക്കമുള്ള വസ്ത്രം ധരിച്ചാണ് പല നടിമാരും അനശ്വരയ്ക്ക് ഐക്യദാർഢ്യം പ്രഖ്യാപിച്ചത്. ‘കാലുകൾ കണ്ടാൽ സദാചാരം ഒഴുകുന്ന ചേട്ടന്മാർക്ക് വേണ്ടി അവതരിപ്പിക്കുന്ന പുതിയ നാടകം, ഈ കാലുകൾ നിങ്ങളെ ചവിട്ടി കൂട്ടാൻ ഉള്ളതാണെന്നും ചിത്രം പങ്കുവച്ച് നടി അമേയ കുറിച്ചു. നടിമാർക്ക് പിന്തുണയുമായി ഒട്ടേറെപുരുഷൻമാരും രംഗത്തെത്തിയെന്നത് ശ്രദ്ധേയമാണ്.
വാട്സാപ്പ് ഗ്രൂപ്പിൽ അംഗമാകുവാൻ ഈ ലിങ്ക് ക്ലിക്ക് ചെയ്യുമല്ലോ..
Post A Comment: