മുംബൈ: ആറ് മണിക്കൂർ നീണ്ട ചോദ്യം ചെയ്യലിൽ നടി റിയ പറഞ്ഞ കാര്യങ്ങൾ കീറിമുറിച്ച് പരിശോധിക്കാൻ അന്വേഷണ സംഘം. നടിയുടെ ചോദ്യം ചെയ്യൽ ഇന്നും തുടരും. അതേസമയം നടിയുടെ അറസ്റ്റ് ഇന്നുണ്ടാകുമെന്നും അന്വേഷണ സംഘത്തിൽ നിന്നും സൂചന ലഭിച്ചിട്ടുണ്ട്. ഇന്നലെയാണ് നടി റിയയെ ആറ് മണിക്കൂറോളം നാർകോട്ടിക് കൺട്രോൾ ബ്യൂറോ ചോദ്യം ചെയ്‌തത്.
താൻ ലഹരി മരുന്ന് ഉപയോഗിച്ചിട്ടില്ലെന്നും സുശാന്ത് സിംഗിന്‍റെ ആവശ്യപ്രകാരമാണ് കഞ്ചാവ് വാങ്ങിച്ചതെന്നും റിയ അന്വേഷണ ഉദ്യോഗസ്ഥർക്ക് മൊഴി നൽകിയതായാണ് സൂചന. തനിക്ക് നേരിട്ട് ലഹരികടത്തുകാരുമായി ബന്ധപ്പെട്ടിട്ടില്ലെന്നും സഹോദരനോടും സുശാന്തിന്‍റെ മാനേജർ സാമുവൽ മിറാന്‍റയോടും ആവശ്യം അറിയിക്കുക മാത്രമാണ് ചെയ്‌തതെന്നും റിയ പറഞ്ഞു.
കേസിൽ ഇതുവരെ എട്ട് പേർ അറസ്റ്റിലായിട്ടുണ്ട്. കേസിൽ അറസ്റ്റിലായ റിയയുടെ സഹോദരൻ ഷോവിക്കിനെയും സുശാന്തിന്‍റെ മാനേജർ സാമുവൽ മിരാൻഡയെയും ഒപ്പമിരുത്തിയായിരിക്കും റിയയെ ഇന്ന് ചോദ്യം ചെയ്യുന്നത്. സഹോദരൻ ഷോവിക്കുമായി നടത്തിയ വാട്സാപ്പ് ചാറ്റുകൾ ലഹരിമരുന്നുമായി ബന്ധപ്പെട്ടവയാണെന്ന് റിയ സമ്മതിച്ചിട്ടുണ്ട്.
വാട്സാപ്പ് ഗ്രൂപ്പിൽ അംഗമാകുവാൻ ഈ ലിങ്ക് ക്ലിക്ക് ചെയ്യുമല്ലോ..
Post A Comment: