കോവിഡ് ചികിത്സയിൽ സർവവും ത്യജിക്കപ്പെട്ടവരാണ് ആരോഗ്യ പ്രവർത്തകർ. മക്കളെ പോലും കാണാനാവാത്ത നഴ്സുമാരുടെ അനുഭവം കഴിഞ്ഞ ദിവസം സോഷ്യൽ മീഡിയയിൽ പ്രചരിച്ചിരുന്നു. ഇപ്പോളിതാ കോവിഡ് ചികിത്സാ കേന്ദ്രത്തിൽ നിന്നുള്ള ഒരു ചിത്രമാണ് വൈറലായിരിക്കുന്നത്. ആരോഗ്യ പ്രവർത്തകരായ ദമ്പതികൾ പരസ്പരം സ്നേഹം പങ്കിടുന്ന ചിത്രമാണിത്. ഐഎഫ്എസ് ഉദ്യോഗസ്ഥയായ സുധ രാമനാണ് ചിത്രം പങ്കുവച്ചിരിക്കുന്നത്. കൊറോണ മഹാമാരിയ്ക്കെതിരായ പോരാട്ടത്തിൽ മുൻ നിരയിൽ നിൽക്കുന്നവർ എന്ന കുറിപ്പോടെയാണ് ചിത്രം.
കൊറോണ വൈറസ് പ്രതിരോധത്തിന് ആയുള്ള വസ്ത്രമെല്ലാം ധരിച്ച് ആശുപത്രിക്കുള്ളിൽ ദമ്പതികൾ പരസ്പരം മുഖം കയ്യിലെടുത്തു നിൽക്കുന്ന ചിത്രമാണിത്. "ലോകത്തിലാകെയുള്ള ആരോഗ്യപ്രവർത്തകരെ ഈ അവസരത്തില് സല്യൂട്ട് ചെയ്യുകയാണ്. കോവിഡ്–19 നെതിരെയുള്ള പോരാട്ടത്തിൽ രാപകലില്ലാതെ പങ്കുചേരുന്നവരാണ് ഈ ദമ്പതികൾ. സുരക്ഷാ വസ്ത്രങ്ങൾ ധരിച്ചാണ് അവർ പരസ്പരം സ്പർശിക്കുന്നതു പോലും. ഇവര് കൊറോണ പോരാളികളാണ്" എന്ന കുറിപ്പോടെയാണ് ചിത്രം പങ്കുവച്ചിരിക്കുന്നത്.
ട്വിറ്ററിൽ പോസ്റ്റ് ചെയ്ത ഉടൻ തന്നെ നിരവധി പേർ ചിത്രം ഷെയർ ചെയ്തു. ആയിരം വാക്കുകൾ പറയാൻ ഉണ്ട് എന്നാണ് ചിത്രത്തിന് ചിലരുടെ കമന്റ്. "സ്നേഹമുള്ള ആത്മാക്കൾ. അവരുടെ ജോലിയോട് ബഹുമാനം." എന്നാണ് മറ്റൊരാളുടെ കമന്റ്.
വാട്സാപ്പ് ഗ്രൂപ്പിൽ അംഗമാകാൻ ലിങ്ക് ക്ലിക്ക് ചെയ്യുമല്ലോ..
ഫെയ്സ് ബുക്ക് പേജ് ലൈക്ക് ചെയ്യുവാൻ
Post A Comment: