കൊച്ചി: ഓടിക്കൊണ്ടിരുന്ന സ്‌കൂൾ ബസിൽ നിന്നും വിദ്യാർഥി തെറിച്ചു റോഡിലേക്ക് വീണു. കുന്നത്തുനാട് പള്ളിക്കരയിൽ വെള്ളിയാഴ്ച്ച വൈകിട്ട് നാലരയ്ക്കാണ് സംഭവം നടന്നത്. രണ്ടാം ക്ലാസ് വിദ്യാർഥിയാണ് റോഡിലേക്ക് തെറിച്ചു വീണത്. കുട്ടി നിസാര പരുക്കുകളോടെ രക്ഷപെട്ടു. ബസിന്‍റെ മുൻ വശത്തുള്ള എമർജൻസി ഡോർ വഴിയാണ് വിദ്യാർഥി റോഡിലേക്ക് തെറിച്ചുവീണത്. സംഭവത്തെ തുടർന്ന് ഓടിരക്ഷപെടാൻ ശ്രമിച്ച സ്‌കൂൾ ബസിന്‍റെ ഡ്രൈവറെ നാട്ടുകാർ ചേർന്ന് പിടികൂടി പൊലീസിൽ ഏൽപ്പിച്ചു.
കിഴക്കമ്പലം സെന്‍റ് ജോസഫ് ഹയർ സെക്കണ്ടറി സ്‌കൂളിന്‍റെ ബസാണ് അപകടത്തിൽപെട്ടത്. ബസിൽ ആയ ഉണ്ടായിരുന്നെങ്കിലും കുട്ടി ഇരുന്നത് മുൻഭാഗത്തായിരുന്നു. കുട്ടിയുടെ പരുക്കുകൾ സാരമുള്ളതല്ലെന്ന് ആശുപത്രി അധികൃതർ അറിയിച്ചു. ബസിന്‍റെ ഡ്രൈവർ ആരക്കുന്നം സ്വദേശി ബൈജുവിനെതിരെ കുന്നത്തുനാട് പൊലീസ് കേസെടുത്തിട്ടുണ്ട്.
മൂവാറ്റുപുഴ ആർ.ടി.ഒ സ്ഥലത്തെത്തി വിശദമായ പരിശോധന നടത്തി. ബൈജുവിന്‍റെ ലൈസൻസ് മൂന്നു മാസത്തേക്ക് സസ്പെൻഡ് ചെയ്‌തിട്ടുണ്ട്. കൂടുതൽ പരിശോധനയ്ക്കായി വാഹനം കസ്റ്റഡിയിൽ വാങ്ങി. തിങ്കളാഴ്ച്ച സ്‌കൂളിലെ മുഴുവൻ ബസുകളും പരിശോധിക്കുമെന്ന് ആർ.ടി.ഒ വ്യക്തമാക്കി.
വാട്‌സാപ്പ് ഗ്രൂപ്പിൽ അംഗമാകുവാൻ
https://chat.whatsapp.com/LI5CtDALiuGFq6TUngq6K5
സംസ്ഥാനത്ത് അഞ്ച് ദിവസം കൂടി കനത്ത മഴ
തിരുവനന്തപുരം: വടക്ക് കിഴക്കൻ അറബിക്കടലിൽ ഗുജറാത്ത് തീരത്തിനു സമീപം ന്യൂനമർദം രൂപപ്പെട്ടു. പടിഞ്ഞാറു ദിശയിൽ സഞ്ചരിക്കുന്ന ന്യൂനമർദം ശക്തി പ്രാപിക്കാൻ സാധ്യതയെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി.
വടക്കൻ ഒഡീഷയ്ക്കും സമീപപ്രദേശത്തിനും മുകളിലായി ന്യൂനമർദം നിലനിൽക്കുന്നുണ്ട്. മൺസൂൺ പാത്തി അതിന്‍റെ സാധാരണ സ്ഥാനത്ത് നിന്നും തെക്കോട്ടുമാറി സജീവമായിരിക്കുന്നു. ജൂലൈ 17മുതൽ മൺസൂൺ പാത്തി വടക്കോട്ടു സഞ്ചരിക്കാൻ സാധ്യതയുള്ളതിനാൽ ഉത്തരേന്ത്യയിൽ വ്യാപകമായ മഴയാണ് പ്രവചിക്കുന്നത്.
ന്യൂനമർദത്തിന്‍റെ സ്വാധീന ഫലമായി കേരളത്തിൽ അടുത്ത അഞ്ച് ദിവസം വ്യാപകമായ മഴയ്ക്കും ഒറ്റപ്പെട്ട സ്ഥലങ്ങളിൽ ശക്തമായ മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ഇന്ന് വടക്കൻ കേരളത്തിലും തൃശൂരിലും ശക്തമായ മഴയാണ് പ്രതീക്ഷിക്കുന്നത്. ജാഗ്രതയുടെ ഭാഗമായി ആറ് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
Post A Comment: