പാമ്പുകളിലെ ഭീകരനാണ് രാജവെമ്പാല. കണ്ടാൽ തന്നെ ആളുകൾ പേടിക്കുന്ന രാജവെമ്പാലയെ വെറും കൈകൊണ്ട് പിടിച്ച് സഞ്ചിയിലാക്കിയ യുവാവിന്റെ വീഡിയോ സോഷ്യൽ മീഡിയയിൽ ശ്രദ്ധ നേടുകയാണ്.
തായ്ലൻഡിൽ നിന്നാണ് വീഡിയോ പുറത്തു വന്നത്. ഇവിടുത്തെ ക്രാബി പ്രവിശ്യയിലെ എണ്ണ പന തോട്ടത്തിലേക്ക് ഇഴഞ്ഞെത്തിയ ഭീമൻ രാജവെമ്പാലയയെയാണ് യുവാവ് സിംപിളായി കീഴടക്കിയത്.
പ്രദേശവാസികളാണ് പാമ്പിനെ ആദ്യം കണ്ടത്. എണ്ണപ്പനകൾ നിറഞ്ഞ തോട്ടത്തിലേക്ക് ഇഴഞ്ഞുപോയ രാജവെമ്പാല സമീപത്തുള്ള വീടിന്റെ സെപ്റ്റിക് ടാങ്കിന്റെ വിടവിലേക്ക് കയറാൻ ശ്രമിച്ചു. വിവരമറിഞ്ഞെത്തിയ ഓ നാങ് സുരക്ഷാസംഘത്തിലെ അംഗമായ സൂറ്റി നേവാദ് ആണ് സെപ്റ്റിക്ക് ടാങ്കിൽ ഒളിക്കാൻ ശ്രമിച്ച രാജവെമ്പാലെ വലിച്ച് പുറത്തേക്കെടുത്തത്. 20 മിനിറ്റോളം നീണ്ട പരിശ്രമത്തിന് ശേഷമാണു സൂറ്റി നേവാദിന് പാമ്പിനെ പൂർണമായും വലിച്ച് പുറത്തേക്കിടാനായത്.
4.5 മീറ്ററോളം നീളവും 10 കിലോയോളം ഭാരവുമുണ്ടായിരുന്നു കൂറ്റൻ പാമ്പിന്. യാതൊരു ഉപകരണങ്ങളുടെയും സഹായമില്ലാതെ വെറും കൈകൊണ്ടാണ് സൂറ്റി നേവാദ് പാമ്പിനെ പുറത്തെത്തിച്ചത്. റോഡിലേക്കെത്തിച്ച പാമ്പ് കഴുത്തിൽ പിടിക്കാൻ ശ്രമിക്കുന്നതിനിടയിൽ പല തവണ നേവാദിനെ ആക്രമിക്കാൻ ശ്രമിക്കുന്നുണ്ടായിരുന്നു.
ഒടുവിൽ പാമ്പിന്റെ ശ്രദ്ധ തിരിച്ച് അതിന്റെ കഴുത്തിൽ പിടുത്തമിട്ട് പാമ്പിനെ വലിയ ബാഗിനുള്ളിലേക്ക് കയറ്റി. കൃത്യമായ പരിശീലനം കൊണ്ട് മാത്രമാണ് തനിക്ക് പാമ്പിനെ അനായാസേന പിടികൂടാൻ സാധിച്ചതെന്ന് സൂറ്റി നേവാദ് വിശദീകരിച്ചു. പരിശീലനം കൂടാതെ പാമ്പിനെ കൈകാര്യം ചെയ്താൽ അപകടം സംഭവിക്കുമെന്നും പ്രദേശവാസികൾക്ക് മുന്നറിയിപ്പ് നൽകി.
വാട്സാപ്പ് ഗ്രൂപ്പിൽ അംഗമാകാൻ ലിങ്ക് ക്ലിക്ക് ചെയ്യുമല്ലോ....
Post A Comment: