ന്യൂഡെൽഹി: ആറ് ജഡ്ജിമാർക്ക് എച്ച് വൺ എൻവൺ പനി പിടിപെട്ടതോടെ സുപ്രീംകോടതിയിലും ആശങ്ക. തുടർനടപടികൾ സ്വീകരിക്കാൻ ജഡ്ജിമാർ ചീഫ് ജഡ്ജിസുമായി കൂടിക്കാഴ്ച്ച നടത്തും. ജസ്റ്റിസ് ഡി.വൈ ചന്ദ്രചൂഡാണ് കോടതിയിൽ ജഡ്ജിമാർക്ക് പകർച്ചപ്പനി പടർന്നുപിടിച്ച കാര്യം അറിയിച്ചത്. ജസ്റ്റിസുമാരായ ആർ. ഭാനുമതി, മോഹനശാന്തന ഗൗഡർ, ഇന്ദിര ബാനർജി, സഞ്ജീവ് ഖന്ന, എസ്. അബ്ദുൾ നസീർ, എ.എസ്. ബൊപ്പണ്ണ എന്നിവർക്കാണ് എച്ച് വൺ എൻ വൺ പനി ബാധിച്ചിട്ടുള്ളത്.
പനിയുടെ പശ്ചാത്തലത്തിൽ സുപ്രീംകോടതിയിലെ ജോലിക്കാർക്കും അഭിഭാഷകർക്കും വാക്സിനേഷൻ നൽകുന്നതിനുള്ള മാർഗ നിർദേശങ്ങൾ നൽകാൻ ജസ്റ്റിസ് ചന്ദ്രചൂഡ് ചീഫ് ജസ്റ്റിസിനോട് അഭ്യർഥിച്ചു. ജസ്റ്റിസ് എൻ.വി രമണയുടെ നേതൃത്വത്തിലുള്ള രണ്ടാം കോടതി മുറിയിൽ ജസ്റ്റിസ് സഞ്ജീവ് ഖന്ന മാസ്ക് ധരിച്ചാണ് കോടതി നടപടികളിൽ പങ്കെടുത്തത്. നേരത്തെ ബംഗലൂരുവിലും കശ്മീരിലും എച്ച്1എന്1 പനി പടരുന്നതായി റിപ്പോർട്ടുകളുണ്ടായിരുന്നു. രണ്ട് ജീവനക്കാർക്ക് എച്ച്1എന്1 പനി സ്ഥിരീകരിച്ചതിനെത്തുടര്ന്ന് ബംഗലൂരുവിലെ എസ്എപി ഇന്ത്യയുടെ ഓഫീസ് ക്ലീനിങ്ങിനായി അടച്ചിരിക്കുകയാണ്.
വാട്സാപ്പ് ഗ്രൂപ്പിൽ അംഗമാകുവാൻ ഈ ലിങ്ക് ക്ലിക്ക് ചെയ്യുമല്ലോ..
ഫെയ്സ് ബുക്ക് പേജിനായുള്ള ലിങ്ക് ചുവടെ
Post A Comment: