കോഴിക്കോട്: ചുരത്തിൽ നിന്നും ഉരുണ്ടു വന്ന കൂറ്റൻ കല്ലിടിച്ച് ഓടിക്കൊണ്ടിരുന്ന ബൈക്ക് കൊക്കയിലേക്ക് തെറിച്ചു വീഴുന്ന വീഡിയോ പുറത്ത്. താമരശേരി ചുരത്തിലുണ്ടായ അപകടത്തിന്റെ വീഡിയോയാണ് മാധ്യമങ്ങളിലൂടെ പുറത്ത് വന്നത്.
ചുരത്തിന്റെ ആറാം വളവിലായിരുന്നു അപകടം. ഏപ്രിൽ 16നായിരുന്നു സംഭവം. അപകടം നടന്ന ബൈക്കിന്റെ തൊട്ടു പുറകിലുണ്ടായിരുന്ന ബൈക്കിലെ യാത്രികർ പകർത്തിയതാണ് വീഡിയോ. മുന്നിലും പുറകിലുമായി ബൈക്കിൽ ഇവർ ചുരത്തിലൂടെ സഞ്ചരിക്കുന്നത് വീഡിയോയിൽ ദൃശ്യമാണ്.
ആറാം വളവിലെത്തിയപ്പോൾ കുന്നിൻ മുകളിൽ നിന്നും കൂറ്റൻപാറ താഴേക്ക് അതിവേഗം ഉരുണ്ടു വരുന്നത് കാണാം. മുന്നിൽ പോയ ബൈക്കിനെ പാറ ഇടിച്ചു തെറിപ്പിച്ചു കൊക്കയിലേക്ക് തള്ളി. നിലമ്പൂർ സ്വദേശി അഭിനവ് (20) അപകടത്തിൽ മരിച്ചിരുന്നു. ഇയാളെ ഗുരുതര പരുക്കുകളോടെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഒപ്പമുണ്ടായിരുന്ന അനീഷിനും ഗുരുതരമായി പരുക്കേറ്റു. അഞ്ചാം വളവിലുള്ള വനത്തിലെ മരത്തിൽ തട്ടിയാണ് കൂറ്റൻ കല്ല് നിന്നത്.
-കടപ്പാട് സമകാലിക മലയാളം
വാട്സാപ്പ് ഗ്രൂപ്പിൽ അംഗമാകുവാൻ
https://chat.whatsapp.com/Drk3CGGtMo5KvmcuCXz9N1
ആദ്യം കണ്ടത് മരത്തിനു മുകളിൽ; സമ്പത്തിനെ കുറിച്ച് മൈഥിലി
കൊച്ചി: നടി മൈഥിലിയും ആർട്ടിടെക്റ്റ് സമ്പത്തും തമ്മിലുള്ള വിവാഹ വിശേഷങ്ങളാണ് സോഷ്യൽ മീഡിയയിൽ ഇപ്പോൾ പ്രധാന ചർച്ച. ഇന്നലെ ഗുരുവായൂരിലാണ് ഇരുവരും വിവാഹിതരായത്. അതേസമയം തന്റെ പ്രണയത്തെ കുറിച്ചും സമ്പത്തിനെ കണ്ടെത്തിയതിനെ കുറിച്ചും മൈഥിലി പറഞ്ഞ കാര്യങ്ങളും ഇപ്പോൾ ശ്രദ്ധ നേടുകയാണ്.
മരത്തിനു മുകളിൽ വച്ചാണ് ആദ്യമായി സമ്പത്തിനെ കണ്ടതെന്ന് മൈഥിലി പറയുന്നു. സമ്പത്ത് ഒരു ട്രീ ഹൗസ് നിർമിക്കുന്ന സമയത്തായിരുന്നു ആദ്യ കാഴ്ച്ച. വസ്തു എടുക്കുന്നതിന്റെ ആവശ്യത്തിന് താനും അമ്മയും അതേ സ്ഥലത്ത് വന്നിരുന്നു. അവിടെ വച്ചാണ് സമ്പത്തിനെ പരിചയപ്പെടുന്നത്. പിന്നീട് ആ പരിചയം പ്രണയമായി മാറി. രണ്ട് കുടുംബങ്ങളുടെയും പിന്തുണയോടെ ലൗ കം അറേഞ്ച്ഡ് മാര്യേജാണ് തങ്ങളുടേതെന്നും മൈഥിലി പറയുന്നു.
ഗുരുവായൂരിലെ താലികെട്ടിനു ശേഷം കൊച്ചിയിൽ വച്ച് സിനിമാ മേഖലയിലെ സുഹൃത്തുക്കൾക്കായി പാർട്ടി ഒരുക്കിയിരുന്നു. ജോജു ജോർജ്, ശ്രിന്ദ, ശ്വേതാ മേനോൻ, അഹാന, ഗ്രേസ് ആന്റണി, സിദ്ധാർഥ് ഭരതൻ, അബു സലീം തുടങ്ങി നിരവധി താരങ്ങൾ റിസപ്ഷനിൽ പങ്കെടുത്തു. പത്തനംതിട്ട കോന്നി സ്വദേശിനിയാണ് ബ്രെറ്റി ബാലചന്ദ്രൻ എന്ന മൈഥിലി. പാലേരി മാണിക്യം എന്ന ചിത്രത്തിലൂടെയാണ് മൈഥിലി സിനിമാ രംഗത്തെത്തുന്നത്. ലോഹം എന്ന ചിത്രത്തിലെ നായികയായി. കേരളാ കഫേ, ചട്ടമ്പിനാട്, നല്ലവൻ, ശിക്കാർ, സാൾട്ട് ആൻഡ് പെപ്പർ, മായാമോഹിനി, ഹണി ബീ, നാടോടി മന്നൻ തുടങ്ങി നിരവധി ചിത്രങ്ങളിൽ വേഷമിട്ടു. ചട്ടമ്പി എന്ന ചിത്രം റിലീസിനൊരുങ്ങുകയാണ്.
Post A Comment: