ഇടുക്കി: കോവിഡ് നിയന്ത്രണങ്ങൾ കാറ്റിപ്പറത്തി സ്വകാര്യ റിസോർട്ടിൽ ബെല്ലി ഡാൻസും നിശാപാർട്ടിയും നടത്തിയ സംഭവത്തിൽ ആറ് പേർ അറസ്റ്റിൽ. റിസോർട്ട് ജീവനക്കാരായ ആറ് പേരെയാണ് ശാന്തൻപാറ പൊലീസ് അറസ്റ്റ് ചെയ്തത്. കൊല്ലമുള വെച്ചൂച്ചിറ മണ്ണടിശാല തോപ്പിൽ മനു കൃഷ്ണ (28), ഉടുമ്പൻചോല ആറ്റുപാറത്താവളം ചുണ്ടങ്ങാ കരയിൽ ബാബു മാധവൻ (49), ശാന്തൻപാറ രാജാപ്പാറ എട്ടാം വാർഡ് കുട്ടപ്പായി ( 50 ), ശാന്തമ്പാറ കള്ളിപ്പാറ വെള്ളമ്മാൾ ഇല്ലം വീട്ടിൽ കണ്ണൻ (50), കോതമംഗലം പിണ്ടിമന തവരക്കാട്ട് ബേസിൽ ജോസ് (35), ചെമ്മണ്ണാർ ഏഴര ഏക്കർ കള്ളിയാനിയിൽ സോജി .കെ ഫ്രാൻസിസ് (43) എന്നിവരെയാണ് അറസ്റ്റു ചെയ്തത്.
ഇവരെ സ്റ്റേഷൻ ജാമ്യത്തിൽ വിട്ടയച്ചു. കൂടുതൽ അന്വേഷണം നടക്കുന്നതായി ജില്ലാ പൊലീസ് മേധാവി അറിയിച്ചു. 47 പേർ പരിപാടിയിൽ പങ്കെടുത്തതായിട്ടാണ് വിവരം. വിദേശ വനിതയെ സംബന്ധിച്ചുള്ള അന്വേഷണം നടന്നു വരികയാണെന്നും പൊലീസ് അറിയിച്ചു. കഴിഞ്ഞ മാസം 28-നാണ് ഉടുമ്പൻചോലക്ക് സമീപം സ്വകാര്യ വ്യവസായ സ്ഥാപനത്തിന്റെ ഉദ്ഘാടനത്തോടനുബന്ധിച്ച് നിശാപാർട്ടിയും ബെല്ലി ഡാൻസും മദ്യസൽക്കാരവും നടത്തിയത്. പാർട്ടിയിൽ എക്സൈസിന്റെ പെർമിറ്റില്ലാതെ ലക്ഷങ്ങളുടെ മുന്തിയ ഇനം വിദേശമദ്യം വിളമ്പിയെന്നും കോവിഡ് മാനദണ്ഡങ്ങൾ പാലിച്ചില്ലന്നും ആണ് കേസ്.
വാട്സാപ്പ് ഗ്രൂപ്പിൽ അംഗമാകുവാൻ ഈ ലിങ്ക് ക്ലിക്ക് ചെയ്യുമല്ലോ..
ഫെയ്സ് ബുക്ക് പേജിനായുള്ള ലിങ്ക് ചുവടെ
Post A Comment: