മുഖം എത്ര സുന്ദരമാണെങ്കിലും കണ്ണുകൾ അൽപം മങ്ങിയതാണെങ്കിലോ.. കണ്ണുകള്ക്ക് താഴെ കറുപ്പ് നിറം പടരുന്നതും ചുളിവുകള് വീഴുന്നതുമാണ് കണ്ണുകളുടെ മനോഹാരിത ഇല്ലാതാക്കുന്ന പ്രധാന കാര്യങ്ങള്. അതുകൊണ്ട് തന്നെ കണ്ണുകളെ പൊന്നുപോലെ നോക്കണം. മുഖം മനസിന്റെ കണ്ണാടിയെങ്കില് മിഴികള് അതിലേയ്ക്കുള്ള വഴിയാണ്.
പ്രായം കൂടി വരുമ്പോള് കണ്ണുകള്ക്ക് ചുറ്റും അതിന്റെ അടയാളങ്ങള് പടര്ന്നു തുടങ്ങാറുണ്ട്. പ്രത്യേകിച്ച് കണ്ണുകള്ക്ക് താഴെയുള്ള അതിലോലമായ ചര്മം ഇരുണ്ട നിറമാകുകയും ചുളിവുകള് വീണ് പ്രായ കൂടുതല് പ്രകടമാക്കുകയും ചെയ്യും. വളരെ മൃദുവായി മാത്രം കൈകാര്യം ചെയ്യേണ്ട ഭാഗമാണ് കണ്ണുകള്ക്ക് താഴെയുള്ള ചര്മം.
പലപ്പോഴും നല്ലതിനായി ചെയ്യുന്ന പല കാര്യങ്ങളും ഈ മൃദു ചര്മത്തെ ദോഷകരമായി ബാധിക്കാറുണ്ട്. നിരന്തരമായി രാസ വസ്തുക്കൾ ഉപയോഗിക്കുന്നതും അള്ട്രാ വയലറ്റ് കിരണങ്ങള് ഏൽക്കുന്നതും ഈ ഭാഗത്തെ സ്വാഭാവികത നഷ്ടമാക്കും.
എങ്ങനെയാണ് കണ്ണുകള്ക്ക് താഴെയുള്ള ഇരുണ്ട നിറവും ചുളിവുകളും മാറ്റിയെടുത്ത് മനോഹരമാക്കുന്നത്? വിപണിയില് പ്രത്യേകമായി ലഭിക്കുന്ന ക്രീമുകള് അതിനായി ഉപയോഗിക്കാം, വിറ്റാമിന് എ, ആന്റി ഓക്സിഡന്റുകൾ, കൊളാജന് എന്നിവയടങ്ങിയ ക്രീമുകള് ഇവ മാറ്റിയെടുക്കാന് സഹായിക്കും.
എന്നാല് രാസ വസ്തുക്കളുടെ ഇടപെടലില്ലാതെയുള്ള പരിഹാര മാര്ഗങ്ങളാണ് എല്ലായിപ്പോഴും നല്ലത്. അതിനായി വീടുകളില് തന്നെ ചെയ്യാവുന്ന ചില എളുപ്പവിദ്യകളുണ്ട്. ഓരോ പ്രശ്നങ്ങളും പരിഹരിക്കുന്നതിനായി എന്തെല്ലാം വഴികളുണ്ടെന്നു നോക്കാം.
- ഡാര്ക്ക് സര്ക്കിള്സ്: കാരണങ്ങള്:
- സ്ത്രീകളിലും പുരുഷന്മാരിലും ഒരുപോലെ കണ്ടു വരുന്നതാണ് ഡാര്ക്ക് സര്ക്കിള്സ്. കണ്ണിന് ചുറ്റും കറുപ്പ് നിറം പടരുന്ന ഈ അവസ്ഥയ്ക്ക് പിന്നില് കാരണങ്ങള് നിരവധിയാണ്. പ്രായം കൂടുമ്പോള് ചർമ്മത്തിന്റെ കട്ടി കുറയുകയും കണ്ണുകള്ക്ക് താഴെയുള്ള ഭാഗം ഇരുണ്ട നിറമാകുകയും ചെയ്യും. പ്രായമാകലിന്റെ ഈ അടയാളത്തെ മറികടക്കുകയാണ് വേണ്ടത്.
- സ്ക്രീന് ഉപയോഗം:
- കൂടുതല് സമയം സ്ക്രീനില് നോക്കുന്നത് കാരണം രക്തക്കുഴലുകള് കൂടുതല് പുറത്തേക്ക് തള്ളി നില്ക്കുന്നതും കണ് തടത്തിലെ ഇരുണ്ട നിറത്തിന് കാരണമാകുന്നുണ്ട്.
- നിര്ജ്ജലീകരണം:
- നിര്ജലീകാരണമാണ് മറ്റൊരു കാരണം. ശരീരത്തില് ആവശ്യത്തിന് ജലാംശമില്ലെങ്കില് അത് കണ്ണുകള്ക്ക് താഴെയുള്ള ചര്മം മങ്ങുന്നതിനും ഇരുണ്ട നിറമാകുന്നതിനും വഴിവെയ്ക്കും.
കോള്ഡ് കംപ്രസ്:
കണ്തടത്തിലെ രക്തക്കുഴലുകള് പൊങ്ങി വരുന്നത് മൂലമുണ്ടാകുന്ന ഇരുണ്ട നിറം ഇല്ലാതാക്കാന് കോള്ഡ് കംപ്രസ് രീതി ഉപയോഗിക്കാം. ഇങ്ങനെ ചെയ്യുന്നത് രക്തക്കുഴലുകളെ ചുരുക്കാനും അതുവഴി ഇരുണ്ട നിറം കുറയ്ക്കാനും സഹായിക്കും. ഇതിനായി ഒരു രണ്ട് ഐസ് ക്യൂബുകള് എടുത്ത് കോട്ടന് തുണിയില് പൊതിഞ്ഞ് കണ്തടത്തില് പതിച്ചു വയ്ക്കാം. ആഴ്ച്ചയിൽ മൂന്നു തവണയെങ്കിലും ഇങ്ങനെ ചെയ്യുന്നത് ഗുണം ചെയ്യും.
കുക്കുംബര്:
കണ്ണുകളിലെ നഷ്ടപ്പെട്ട തിളക്കം വീണ്ടെടുക്കാന് കുക്കുംബര് കട്ടിയില് മുറിച്ചെടുത്ത ശേഷം 45 മിനിറ്റ് ഫ്രീസറില് സൂക്ഷിച്ച് ഇത് കണ്ണുകള്ക്ക് മുകളില് വെയ്ക്കണം. കുറഞ്ഞത് 10 മിനിറ്റ് നേരമെങ്കിലും ഇത് കണ്ണുകള്ക്ക് മുകളില് സൂക്ഷിയ്ക്കണം. ആഴ്ചയില് രണ്ടു തവണ ഇത് ചെയ്യാനായി ശ്രദ്ധിയ്ക്കൂ.
തക്കാളി:
ധാരാളം ആന്റി ഓക്സിഡന്റുകൾ അടങ്ങിയ തക്കാളി കണ്ണുകളുടെ തിളക്കത്തിന് സഹായകമാണ്. തക്കാളി ജ്യൂസ് അൽപ്പം നാരങ്ങാ നീരിനൊപ്പം കലര്ത്തി കണ്ണുകള്ക്ക് ചുറ്റും പുരട്ടാം. 15 മിനിറ്റിനു ശേഷം ഇത് കഴുകി കളയാം. തക്കാളി നടുകെ മുറിച്ച് ഫ്രീസറില് സൂക്ഷിച് കണ്ണുകള്ക്ക് മുകളില് വയ്ക്കുന്നതും നല്ലതാണ്. അമിത് തണുപ്പ് ഒഴിവാക്കാനായി ഒരു നേര്ത്ത ടിഷ്യൂ ഉപയോഗിക്കാം.
ബദാം ഓയില്,നാരങ്ങാ നീര്:
ഒരു ടീ സ്പൂൺ ബദാം ഓയിലിനൊപ്പം രണ്ടോ മൂന്നോ തുള്ളി നാരങ്ങാ നീര് കൂടി കലര്ത്തി കണ്ണുകള്ക്ക് താഴെ പുരട്ടാം. 5 മിനിറ്റിനു ശേഷം ഇത് കഴുകി കളയാം. ആഴ്ച്ചയിൽ പല തവണ ചെയ്യുകയാണെങ്കില് കുറഞ്ഞ സമയത്തിനുള്ളില് പ്രകടമായ വ്യത്യാസം കാണാന് കഴിയും.
വിറ്റാമിന് ഇ,ബദാം ഓയില്:
വിറ്റാമിന് ഇ ഓയില്, ബദാം ഓയില് എന്നിവ തുല്യ അളവിലെടുത്ത് യോജിപ്പിച്ച ശേഷം കണ്ണുകള്ക്ക് ചുറ്റും ഇത് പുരട്ടുക. ഉറങ്ങുന്നതിനു 10 മിനിറ്റ് മുമ്പ് പുരട്ടി മസാജ് ചെയ്യാം. രാത്രി മുഴുവന് ഇത് ചര്മത്തില് ഇരിയ്ക്കുന്നത് ഗുണം ചെയ്യും. രാവിലെ തണുത്ത വെള്ളത്തില് കഴുകി കളയാം.
ടീ ബാഗ് ഉപയോഗിക്കാം:
അതിവേഗത്തില് മികച്ച ഫലം തരുന്ന ഒന്നാണ് ടീ ബാഗ് ഉപയോഗം. ഇതിനായി ടീ ബാഗ് ചൂടുവെള്ളത്തില് കുതിര്ത്ത ശേഷം 15 മിനിറ്റ് ഫ്രീസറില് സൂക്ഷിയ്ക്കുക. ശേഷം ഇത് കണ്ണുകള്ക്ക് മുകളില് വയ്ക്കണം.5 മിനിറ്റിനു ശേഷം എടുത്ത് മാറ്റാം. രണ്ടു ടീ ബാഗുകള് എടുത്താല് ഒരേ സമയം രണ്ടു കണ്ണുകള്ക്കും ഉപയോഗിക്കാം.
ചുളിവുകള്:
അടുത്ത പ്രശ്നമാണ് കണ്ണുകള്ക്ക് താഴെ ചുളിവുകള് വീഴുന്നത്. 30 കളുടെ മധ്യഘട്ടത്തിലാണ് പലരുടെയും കണ്ണുകള്ക്ക് താഴെ ചുളിവുകള് കണ്ടു തുടങ്ങുന്നത്. ജീവിത ശൈലി,മേക്കപ്പ് ഉപയോഗം എന്നിവയെല്ലാം അനുസരിച്ച് പ്രായത്തില് ചില വ്യത്യാസങ്ങള് ഉണ്ടാകാം. എങ്ങനെയാണ് ഈ ചുളിവുകളെ വീട്ടു വൈദ്യത്തിലൂടെ മറികടക്കുക എന്ന് നോക്കാം.
കാരണങ്ങള്:
- അള്ട്രാവയലറ്റ് കിരണങ്ങള്:
- വെയിലേല്ക്കുന്ന സാഹചര്യങ്ങളില് കണ്ണുകളെ സംരക്ഷിയ്ക്കാന് ആവശ്യമായ മുന്കരുതലുകള് സ്വീകരിച്ചില്ലെങ്കില് അള്ട്രാവയലറ്റ് കിരണങ്ങള് ശരീരത്തില് പതിച്ച് ചര്മത്തില് ചുളിവുകള് വീഴും. കണ്ണുകള്ക്ക് താഴെയുള്ള ചര്മത്തിനാണ് ഇത് ഏറെ കേടുപാടുകള് ഉണ്ടാക്കുന്നത്. ചുളിവുകള് വീഴുന്നത് തടയുകയാണ് ഏറ്റവും നല്ല മാര്ഗം.
- പുകവലി:
- പുകവലി മുഖ ചര്മത്തിലെ കൊലാജെന് സംവിധാനത്തെ നശിപ്പിക്കുകയും അതുവഴി പാടുകള് വീഴുകയും ചെയ്യും. പുകവലി മൂലം മുഖത്തെ രക്തക്കുഴലുകള് പതിവിലധികം ചുരുങ്ങുകയും പോഷകങ്ങള് കണ്ണുകളുടെ ഭാഗത്തേക്ക് ലഭിക്കാതിരിക്കുകയും ക്രമേണ ചുളിവുകള് വീണ് അഭംഗിയുണ്ടാക്കുകയും ചെയ്യാറുണ്ട്.
- പഞ്ചസാരയുടെ അമിത ഉപയോഗം:
- പഞ്ചസാര കൂടുതലടങ്ങിയ ഭക്ഷണക്രമം പ്രായ ക്കൂടുതല് തോന്നിക്കുന്നതിന് കാരണമാകാറുണ്ട്. ഇത് ശരീരത്തിലെ ആന്റിഓക്സൈഡുകളെ ഇല്ലാതാക്കുമെന്നത് തന്നെ കാരണം. അതിനാല് പഞ്ചസാര ഉപയോഗം പരമാധി കുറയ്ക്കുന്നത് കണ്ണുകള്ക്ക് ചുറ്റുമുള്ള ചര്മത്തെ മെച്ചപ്പെടുത്തും.
കറ്റാര് വാഴ:
മുഖത്തെ ചുളിവുകളും പാടുകളും നീക്കി മനോഹരമാക്കാന് കറ്റാര്വാഴ മികച്ചതാണെന്ന് അറിയാമല്ലോ, അതിനാല് ചുളിവുകള് ഇല്ലാതാക്കാനായി ആദ്യം പരീക്ഷിയ്ക്കേണ്ടത് കറ്റാര് വാഴ തന്നെയാണ്. ഇതിന്റെ ജെല് എടുത്ത് നന്നായി മുഖത്ത് മസാജ് ചെയ്യാം. ചുളിവുകള് കുറയ്ക്കുകയും ചര്മത്തിലെ ജലാംശം നിലനിര്ത്താനും ഇത് ഉപകരിയ്ക്കും.
പഴം മാസ്ക്ക്:
ഒരു പഴം നന്നായി ഉടച്ച് കണ് തടത്തില് പുരട്ടി മസാജ് ചെയ്യൂ. 20 മിനിറ്റിനു ശേഷം ഇത് ഇളം ചൂടുവെള്ളത്തില് കഴുകി കളയാം. പഴത്തില് അടങ്ങിയിട്ടുള്ള വിറ്റാമിനുകളും സ്വാഭാവിക ജലാംശവും ചര്മത്തിലെ ചുളിവുകള് നീക്കം ചെയ്ത് മനോഹരമാക്കും.
എഗ്ഗ് വൈറ്റ്:
ഒരു മുട്ടയുടെ വെള്ളയെടുത്ത് അത് നന്നായി മുഖത്ത് പുരട്ടണം. അല്പ സമയത്തിനകം ഇത് ഉണങ്ങി തുടങ്ങും. മുഖ ചര്മം വലിഞ്ഞു തുടങ്ങുമ്പോള് തണുത്ത വെള്ളത്തില് കഴുകി വൃത്തിയാക്കാം. ഇത് ചുളിവുകള് ഇല്ലാതാക്കുകയും കൊലാജെന് ഉൽപ്പാദനം വർധിപ്പിക്കുകയും ചെയ്യും.
വിറ്റാമിന് സി:
ചര്മത്തിലെ കൊലാജെന് ഉദ്പാദനം വര്ധിപ്പിയ്ക്കാനുള്ള ഏറ്റവും മികച്ച വഴിയാണ് വിറ്റാമിന് സിയുടെ ഉപയോഗം. മികച്ച ആന്റിഓക്സിഡന്റായി പ്രവര്ത്തിയ്ക്കുന്നതിനാല് ഇത് കൂടുതല് അളവില് കൊലാജെന് ഉൽപ്പാദിപ്പിക്കും. ചര്മത്തിലെ പാടുകള് നീക്കം ചെയ്യുകയും ജലാംശം നിലനിര്ത്താനും ഇത് സഹായകമാകും.
വെളിച്ചെണ്ണയും മഞ്ഞളും:
ഒരു ടീ സ്പൂൺ വെളിച്ചെണ്ണയും മഞ്ഞളും യോജിപ്പിച്ച് കണ്ണുകള്ക്ക് താഴെ പുരട്ടുക. 20 മിനിറ്റിനു ശേഷം ഇത് കഴുകി കളയാം. ഈ മിശ്രിതത്തിലേക്ക് അൽപ്പം ബദാം ഓയില് കൂടി യോജിപ്പിച്ചാല് ഫലം ഇരട്ടിയാകും.
വാട്സാപ്പ് ഗ്രൂപ്പിൽ അംഗമാകാൻ ലിങ്ക് ക്ലിക്ക് ചെയ്യുമല്ലോ..
https://chat.whatsapp.com/JADaOBrSTxqKfsrW1ZkLRV
Post A Comment: