നിർബന്ധിച്ച് മയക്കു മരുന്ന് നൽകി; വായിൽ രാസവസ്‌തു ഒഴിച്ചു; ഭർത്താവിന്‍റെ ക്രൂര പീഡനത്തിനിരയായ യുവതി ആശുപത്രിയിൽ

കൊച്ചി: ഭർത്താവ് ക്രൂരമായി പീഡിപ്പിച്ചെന്നാരോപിച്ച് യുവതി. ചോറ്റാനിക്കര സ്വദേശിയായ യുവതിയാണ് അവശ നിലയിൽ ആശുപത്രിയിൽ ചികിത്സ തേടിയിരിക്കുന്നത്. യുവതി ചോറ്റാനിക്കര പൊലീസിൽ പരാതി നൽകിയതിനെ തുടർന്ന് കേസെടുത്ത് അന്വേഷണം ആരംഭിച്ചു. 2018 സെപ്റ്റംബർ ഏഴിനാണ് കൊടുങ്ങല്ലൂർ കൊമ്പാത്തുകടവ് കണ്ണാടിപ്പറമ്പ്​ സ്വദേശി യുവതിയെ വിവാഹം ചെയ്‌തത്‌. വിവാഹശേഷം ഇയാൾ ജോലി ചെയ്‌തിരുന്ന കാനഡയിലേക്ക് യുവതിയെ കൊണ്ടുപോയി. അവിടെ വെച്ച് യുവതിയെ ശാരീരികമായും ലൈംഗികമായും മാനസികമായും പീഡിപ്പിച്ചിരുന്നതായി പരാതിയിൽ പറയുന്നു.

ഇയാൾ മയക്കുമരുന്നിന് അടിപ്പെട്ടിരു​ന്നെന്ന് യുവതിയുടെ വീട്ടുകാർ പറഞ്ഞു. ഭർതൃവീട്ടുകാരും യുവതിയെ പീഡിപ്പിച്ചിരുന്നു. നിർബന്ധിച്ച് ലഹരിമരുന്നുകൾ കഴിപ്പിക്കുകയും നിരവധി തവണ പല ആവശ്യങ്ങൾ പറഞ്ഞ് യുവതിയുടെ വീട്ടുകാരിൽനിന്ന്​ പണം കൈപ്പറ്റുകയും ചെയ്​തത്രെ. വിവാഹസമ്മാനമായി നൽകിയ 75 പവന്‍റെ ആഭരണങ്ങൾ വിറ്റു. ലഹരിവസ്​തുക്കൾ വാങ്ങി പണം നശിപ്പിച്ചതായും പരാതിയിൽ പറയുന്നു. യുവതിയുടെ വായിൽ ഡ്രാനോ എന്ന രാസവസ്‌തു ഒഴിച്ചതിനെ തുടർന്ന്  ശരീരമാസകലം പൊള്ളുകയും ആന്തരികാവയവങ്ങൾക്ക് ക്ഷതമേൽക്കുകയും ചെയ്​തിട്ടുണ്ട്.

കാനഡയിൽ നിന്ന്​ നാട്ടിലെത്തിച്ച ഉടനെ യുവതി കൊച്ചിയിലെ സ്വകാര്യ ആശുപത്രിയിൽ ചികിത്സ തേടി. കഴിഞ്ഞ ദിവസമാണ് വീട്ടിലേക്ക്​ മാറിയത്. ആന്തരികാവയവങ്ങൾ തകരാറിലായതിനാൽ സംസാരിക്കാൻ കഴിയാത്ത അവസ്ഥയിലാണ്. ട്യൂബിലൂടെയാണ് ഭക്ഷണം കഴിക്കുന്നത്. വനിത കമീഷന്​ പരാതി നൽകിയതിനെത്തുടർന്ന് അന്വേഷണത്തിന് ഉത്തരവിട്ടിരുന്നു.

വാട്സാപ്പ് ഗ്രൂപ്പിൽ അംഗമാകാൻ  ലിങ്ക് ക്ലിക്ക് ചെയ്യുമല്ലോ..

https://chat.whatsapp.com/K1qDeudCPifDXl43GW7kbz