ബേക്കറിയിലെ ചില്ലുകൂട്ടിൽ ജിലേബി കണ്ടാൽ തന്നെ നാവിൽ കൊതിയൂറും. കുട്ടികൾക്കും മുതിർന്നവർക്കും ഒരു പോലെ ഇഷ്‌ടമുള്ള പലഹാരമാണ് ജിലേബി. എന്നാൽ ബേക്കറികളിൽ കാണുന്ന ജിലേബി നമുക്ക് വീട്ടിലുണ്ടാക്കിയാലോ.
ആവശ്യമുള്ള സാധനങ്ങൾ:
- മൈദ - 2 കപ്പ്
- തൈര് - 2 ടേബിൾസ്‌പൂൺ
- പഞ്ചസാര - 2 കപ്പ്
- അരിപ്പൊടി - 1/2 കപ്പ്
- മഞ്ഞൾപൊടി - ആവശ്യത്തിന്
- ബേക്കിങ് പൗഡർ - പാകത്തിന്
- എണ്ണ - ആവശ്യത്തിന്
- ഉപ്പ് - ആവശ്യത്തിന്
തയ്യാറാക്കുന്ന വിധം:
മൈദയും, തൈരും, വെള്ളവും ചേർത്ത് നല്ല മയത്തിൽ കലക്കി തലേ ദിവസം വയ്ക്കണം. പിറ്റേ ദിവസം മിശ്രിതത്തിലേക്ക് അരിപ്പൊടി, മഞ്ഞൾപൊടി, ഉപ്പ്, ബേക്കിങ് പൗഡർ എന്നിവ മുകളിൽ പറഞ്ഞ അളവിൽ ചേർത്ത് മിക്‌സിയിൽ നന്നായി അടിച്ചെടുക്കുക.
രണ്ടു കപ്പ് പഞ്ചസാരയിൽ ഒരു കപ്പ് വെള്ളം ചേർത്ത് പഞ്ചസാര പാനി തയ്യാറാക്കി വയ്ക്കുക. തുടർന്ന് മിക്‌സിയിൽ അടിച്ച മിശ്രിതം ഒരു പ്ലാസ്റ്റിക്ക് കവറിൽ കോൺ ആകൃതിയിൽ ആക്കി വയ്ക്കുക. പാനിൽ എണ്ണ ചൂടാക്കിയ ശേഷം, കോണാകൃതിയിലാക്കിയ കവറിന്‍റെ കൂർത്ത അറ്റം ആവശ്യത്തിന് വലിപ്പത്തിൽ മുറിച്ച് ഇഷ്‌ടമുള്ള ഷേപ്പിൽ ജിലേബി വറുത്തെടുക്കാം. വറുത്തു കോരുന്ന ജിലേബി പഞ്ചസാര പാനിയിൽ മുക്കി വയ്ക്കുക.
വാട്സാപ്പ് ഗ്രൂപ്പിൽ അംഗമാകാൻ ലിങ്ക് ക്ലിക്ക് ചെയ്യുമല്ലോ....
Post A Comment: