കൊച്ചി: പരിധി വിട്ട ബന്ധം ചോദ്യം ചെയ്‌ത യുവതിയെ അമ്മായി അമ്മയുടെ പുരുഷ സുഹൃത്ത് ക്രൂരമായി മർദിച്ചു. പെരുമ്പാവൂർ സ്വദേശിനി എം.എസ്. വൈഷ്‌ണവിയാണ് പരുക്കേറ്റ് ചികിത്സ തേടിയിരിക്കുന്നത്. ആറ് മാസം മുമ്പ് വിവാഹിതയായ വൈഷ്‌ണവിയെ അമ്മായി അമ്മയുടെ പുരുഷ സുഹൃത്താണ് മർദിച്ചതെന്ന് ഇവർ പറയുന്നു. തൃശൂർ കൊരട്ടി സ്വദേശിയുമായിട്ടായിരുന്നു വൈഷ്ണവിയുടെ വിവാഹം. പരുക്കേറ്റ യുവതിയെ അങ്കമാലിയിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.
അമ്മായി അമ്മയും സഹോദരനും തന്നെ മർദിച്ചതായും യുവതി പറയുന്നു. ഭർതൃവീടിന്‍റെ മൂന്ന് കിലോമീറ്റർ പരിധിയിലാണ് അമ്മായി അമ്മയുടെ പുരുഷ സുഹൃത്ത് താമസിച്ചിരുന്നത്. വിധവകളെ സഹായിക്കുന്നതിന്‍റെ മറവിൽ ഇയാൾ സ്ത്രീകളുമായി പരിധി വിട്ട ബന്ധം സ്ഥാപിക്കുന്നുണ്ട്. അമ്മായി അമ്മയും ഇയാളുമായുള്ള ബന്ധം പരിധി വിടുന്നതായി കണ്ടതോടെ വൈഷ്‌ണവി ഇക്കാര്യത്തിൽ എതിർപ്പ് അറിയിച്ചിരുന്നു. ഇതാണ് വൈരാഗ്യത്തിനു കാരണമായത്.
ഇയാൾ പറയുന്നത് മാത്രമേ കേൾക്കാവു എന്ന സ്ഥിതിയായിരുന്നു അമ്മയ്ക്കെന്ന് യുവതിയുടെ ഭർത്താവ് മുകേഷ് പറയുന്നു. ഇയാൾ കൊല്ലുമെന്ന് ഭീഷണി മുഴക്കിയതായും ഇതോടെ ഇയാളുടെ ഭാര്യയെയും മകനെയും ഇക്കാര്യം അറിയിച്ചതായും ഭർത്താവ് പറഞ്ഞു. പ്രശ്‌നം രമ്യമായി പരിഹരിക്കാമെന്നായിരുന്നു വീട്ടുകാരുടെ നിലപാട്.
എന്നാൽ ഇതിനിടെ ഞായറാഴ്ച്ച അയൽവീട്ടിൽ സംസാരിച്ചിരിക്കെ ഇയാൾ അപ്രതീക്ഷിതമായി വരികയും വൈഷ്ണവിയുടെ മുഖത്തടിക്കുകയുമായിരുന്നു. തടയാൻ ചെന്ന ഭർത്താവിനും മർദനമേറ്റു. ഇയാൾ വന്ന കാർ തടഞ്ഞിട്ട് നാട്ടുകാരെ വിളിച്ചു കൂട്ടിയ ശേഷമാണ് യുവതിയെ ആശുപത്രിയിലെത്തിച്ചത്. സിവിൽ എൻജിനീയറിങ് അവസാന വർഷ വിദ്യാർഥിനിയാണ് വൈഷ്‌ണവി. സംഭവത്തിൽ അന്വേഷണം ആരംഭിച്ചതായും പ്രതി ഒളിവിലാണെന്നും പൊലീസ് അറിയിച്ചു.
വാട്‌സാപ്പ് ഗ്രൂപ്പിൽ അംഗമാകുവാൻ
https://chat.whatsapp.com/LI5CtDALiuGFq6TUngq6K5
വർക്കല തീ പിടുത്തം; അഞ്ച് പേർ മരിച്ചത് പുക ശ്വസിച്ച്
തിരുവനന്തപുരം: വർക്കലയിൽ ഒരു വീട്ടിലെ അഞ്ച് പേർ മരിച്ചത് തീ പൊള്ളലേറ്റല്ല പുക ശ്വസിച്ചാണെന്ന് നിഗമനം. ചെറുന്നിയൂർ ബ്ലോക്ക് പഞ്ചായത്ത് ഓഫീസിനു സമീപത്തെ വീടിനു തീ പിടിച്ചാണ് എട്ട് മാസം പ്രായമുള്ള കുഞ്ഞ് ഉൾപ്പെടെ അഞ്ച് പേർ മരിച്ചത്. മരിച്ചവരുടെ ആരുടെയും വസ്ത്രം കത്തിയിട്ടില്ല. വീടിനുള്ളിൽ തങ്ങി നിന്ന പുക ശ്വസിച്ചതാണ് മരണ കാരണമെന്നാണ് കരുതുന്നത്.
പ്രാഥമിക പരിശോധനയിൽ ദുരൂഹതയൊന്നും കണ്ടെത്തിയിട്ടില്ല. ബേബി എന്ന പ്രതാപൻ(62), ഭാര്യ ഷെർലി(53), ഇവരുടെ മകൻ അഹിൽ(25), മറ്റൊരു മകന്‍റെ ഭാര്യ അഭിരാമി(24), നിഹുലിന്‍റെയും അഭിരാമിയുടെയും എട്ട് മാസം പ്രായമുള്ള ആൺ കുഞ്ഞ് എന്നിവർ ആണ് മരിച്ചത്. ഗുരുതരമായ പരിക്കേറ്റ മൂത്ത മകൻ നിഹുലിനെ(29) തിരുവനന്തപുരത്തെ സ്വകാര്യ ആശുപത്രിയിലേക്ക് മാറ്റി.
ബൈക്കിൽ നിന്നാണ് തീ പടർന്നതെന്നാണ് ആദ്യം കരുതിയിരുന്നത്. എന്നാൽ ബൈക്കിൽ നിന്നല്ല തീ പടർന്നതെന്നും കണ്ടെത്തിയിട്ടുണ്ട്. ഷോർട്ട് സർക്യൂട്ടാകാമെന്നാണ് പ്രാഥമിക നിഗമനം. വീട്ടിനുള്ളിൽ പെട്ട്രോൾ മണ്ണെണ്ണ പോലുള്ള ഇന്ധനങ്ങളുടെ സാന്നിധ്യം നിലവിൽ കണ്ടെത്തിയിട്ടില്ല. തീപിടുത്തം തുടങ്ങി 45 മിനിറ്റിനു ശേഷം ആണ് എല്ലാവരെയും പുറത്തെത്തിക്കാൻ ആയത്.
എല്ലാ മുറിയിലും എസി ആയതിനാൽ പുക പുറത്ത് പോയില്ല. ഇലക്ട്രോണിക്സ് ഉപകരണങ്ങൾ , എസി ഉൾപ്പെടെ എല്ലാം കത്തി നശിച്ചു. ഫോൺ വിളിച്ച ശേഷവും രണ്ടാമത്തെ മകന് പുറത്തേക്ക് വരാൻ കഴിയാത്തത് കടുത്ത പുക ശ്വസിച്ചതിനെത്തുടർന്നാണെന്നാണ് സംശയം.
തീപിടിത്തത്തിന്‍റെ കാരണം കണ്ടെത്താൻ ഫൊറൻസിക് സംഘം വീട്ടിൽ പരിശോധന നടത്തുകയാണ്. വീടിന്റെ താഴത്തേയും മുകളിലെയും നിലയിലെ ഹാൾ പൂർണമായി കത്തി നശിച്ചു.ഫൊറൻസിക് റിപ്പോർട്ട് ലഭിച്ച ശേഷമേ കൂടുതൽ കാര്യങ്ങൾ പറയാൻ കഴിയൂവെന്നും റേഞ്ച് ഐ ജി ആർ.നിശാന്തിനിയും പറഞ്ഞു. അഭിരാമിയുടെയും കുഞ്ഞിന്‍റെയും മൃതദേഹം കിടന്നത് മുകൾനിലയിലെ മുറിയിലെ ബാത്റൂമിൽ ആയിരുന്നു. ഇളയമകൻ അഹിലിന്‍റെ മൃതദേഹം മുകളിലത്തെ നിലയിലെ മറ്റൊരു മുറിയിൽ ആണ്. പ്രതാപന്‍റെയും ഷേർലിയുടെയും മൃതദേഹം കിടന്നത് താഴത്തെ മുറിയിൽ ആണെന്നും ഫയർഫോഴ്സ് ഉദ്യോഗസ്ഥർ പറയുന്നു.
Post A Comment: