ഫ്രി‌ഡ്‌ജിൽ രക്തക്കറ; നരബലിക്ക് ഉപയോഗിച്ച ആയുധങ്ങൾ കണ്ടെടുത്തു

പത്തനംതിട്ട: ഇരട്ട നരബലി നടന്ന ഇലന്തൂരിലെ ഭഗവൽ സിങ്ങ്- ലൈല ദമ്പതികളുടെ വീട്ടിൽ നിന്നും ആയുധങ്ങൾ അടക്കം കണ്ടെടുത്തു. വീടിനോട് ചേർന്ന തിരുമ്മൽ കേന്ദ്രത്തിൽ നിന്നാണ് കൊലപാതകത്തിന് ഉപയോഗിച്ചതെന്ന് കരുതുന്ന ആയുധങ്ങൾ കണ്ടെത്തിയത്. ഇവ കൂടുതൽ പരിശോധനകൾക്കായി മാറ്റും. ആയുധങ്ങളിൽ രക്തക്കറ കണ്ടെത്തിയതായിട്ടാണ് പ്രാഥമിക വിവരം. ശാസ്ത്രീയ പരിശോധനയിലാണ് രക്തക്കറ കണ്ടെത്തിയത്.

അതേസമയം വീടിനു സമീപത്തു നിന്നും ഒരു അസ്ഥി കണ്ടെത്തിയിട്ടുണ്ട്. വീടിന്‍റെ വടക്കു കിഴക്കു ഭാഗത്ത് ഒരു മരത്തിനു സമീപത്തായിട്ടാണ് അസ്ഥിക്ഷണം കണ്ടെത്തിയത്. ഇത് മനുഷ്യരുടേതാണോയെന്ന് സ്ഥിരീകരിച്ചിട്ടില്ല. അസ്ഥി കഷണം പരിശോധനകൾക്കായി മാറ്റിയിട്ടുണ്ട്. ഇത് പോത്തിന്‍റേതാണെന്ന നിഗമനത്തിലാണ് അന്വേഷണ സംഘം. 

വീട്ടിനുള്ളിലെ ഫ്രിഡ്ജിൽ രക്തക്കറ സ്ഥിരീകരിച്ചിട്ടുണ്ട്. കൊലപ്പെടുത്തിയ ശേഷം മാംസം ഫ്രഡ്‌ജിൽ സൂക്ഷിച്ചിരുന്നോയെന്ന സംശയമാണ് ബലപ്പെടുന്നത്. ഈ രക്തക്കറ ആരുടേതാണെന്ന് കണ്ടെത്താനുള്ള പരിശോധനകളും തുടർന്ന് നടക്കും. വീടിനോട് ചേർന്ന ആറ് സ്ഥലങ്ങളിൽ കുഴിച്ച് പരിശോധന നടത്തേണ്ടി വരുമെന്നാണ് കരുതുന്നത്. അന്വേഷണ സംഘം കൂടിയാലോചന നടത്തിയ ശേഷമായിരിക്കും ഇക്കാര്യത്തിൽ തീരുമാനമെടുക്കുക. 

വാട്‌സാപ്പ് ഗ്രൂപ്പിൽ അംഗമാകുവാൻ

https://chat.whatsapp.com/K9HGPi6sF9nFJuDUTC4VNe

ബുധനാഴ്ച്ച വരെ മഴയ്ക്ക് സാധ്യത 

തിരുവനന്തപുരം: സംസ്ഥാനത്ത് വരുന്ന ബുധനാഴ്ച്ച വരെ വ്യാപക മഴയ്‌ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രം. ഇന്ന് ഒൻപത് ജില്ലകളിൽ യെല്ലോ അലർട്ട് പുറപ്പെടുവിച്ചിട്ടുണ്ട്. കൊല്ലം, പത്തനംതിട്ട, കോട്ടയം, ഇടുക്കി, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് ഇന്ന് മഴ വ്യാപകമാകാൻ സാധ്യതയെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു. 

തിരുവനന്തപുരം, ആലപ്പുഴ, എറണാകുളം, തൃശൂർ, പാലക്കാട് ജില്ലകളിൽ ഇന്ന് അലർട്ടില്ല. നാളെ മുതൽ ബുധനാഴ്ച വരെ തെക്കൻ കേരളത്തിൽ കൂടുതൽ മഴയ്ക്ക് സാധ്യതയുണ്ട്. തിരുവനന്തപുരം മുതൽ ഇടുക്കി വരെയുള്ള ജില്ലകളിൽ നാളെ യെല്ലോ അലർട്ട് പ്രഖ്യാപിച്ചിട്ടുണ്ട്. വടക്കൻ കേരളത്തിൽ പാലക്കാട് മാത്രമാണ് നാളെ യെല്ലോ അലർട്ട് ഉള്ളത്. തിങ്കൾ. ചൊവ്വ ദിവസങ്ങളിൽ കണ്ണൂരും കാസർകോടും ഒഴികെയുള്ള 12 ജില്ലകളിൽ യെല്ലോ അലർട്ടാണ്. ബുധനാഴ്ച വയനാട്,കണ്ണൂർ, കാസർകോട് ഒഴികെയുള്ള ജില്ലകളിലാണ് യെല്ലോ അലർട്ട്.