നെറ്റ് റൺറേറ്റിൽ മുന്നിലെത്തി ഇന്ത്യ; സെമി കളിക്കാൻ ഭാഗ്യം കനിയണം

ദുബായ്: സ്കോട്ട്‌ലന്‍റിനെതിരെ 86 റൺസിന്‍റെ വിജയ ലക്ഷ്യം പിന്തുടർന്ന ഇന്ത്യ വിജയലക്ഷ്യം മറികടന്നത് 39 പന്തിൽ. ഇതോടെ ടി 20 ലോകകപ്പിൽ നെറ്റ് റൺറേറ്റിൽ പാക്കിസ്ഥാനെയും ന്യൂസിലന്‍റിനെയും അഫ്ഗാനിസ്ഥാനെയും ഇന്ത്യ പിന്നിലാക്കി. ആദ്യ രണ്ട് മത്സരങ്ങളിൽ തോറ്റതോടെ സെമി സാധ്യത മങ്ങിയ സ്ഥാനത്തു നിന്നാണ് തുടർച്ചയായ രണ്ടാം ജയത്തോടെ ഇന്ത്യ തിരിച്ചുവരവ് അറിയിച്ചിരിക്കുന്നത്. എട്ട് വിക്കറ്റിനാണ് സ്കോട്ട്‌ലന്‍റിനെ ഇന്ത്യ വീഴ്ത്തിയത്. 

ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ സ്കോട്‌ലന്‍റ് 17.4 ഓവറിൽ 85 റൺസിന് പുറത്തായി. നെറ്റ് റൺറേറ്റിൽ മുന്നിലുണ്ടായിരുന്ന അഫ്ഗാനിസ്ഥാനെ മറികടക്കാൻ 7.1 ഓവറിൽ വിജയ ലക്ഷ്യം മറികടക്കേണ്ടിയിരുന്ന ഇന്ത്യ 39 പന്തിൽ ലക്ഷ്യത്തിലെത്തി. ക്യാപ്റ്റൻ വിരാട് കോലിയുടെ ജൻമദിനത്തിലാണ് ഇന്ത്യ മിന്നുന്ന ജയം നേടിയത്. സ്കോട്‌ലന്‍റിനെതിരെ ഇന്ത്യ വിജയ ലക്ഷ്യം മറികടക്കുമ്പോൾ 81 പന്തുകൾ ബാക്കിയായിരുന്നു. ഇത് റെക്കോർഡാണ്.  

അതേസമയം രണ്ട് വിജയം സ്വന്തമാക്കിയെങ്കിലും സെമിയിലേക്കെത്താൻ ഭാഗ്യം കൂടി ഇന്ത്യക്കൊപ്പമെത്തണം. ന്യൂസിലാന്‍റിനെതിരായ മത്സരത്തിൽ അഫ്ഗാനിസ്ഥാൻ ജയിക്കുകയും അവസാന മത്സരത്തിൽ നമീബിയയെ തോൽപിക്കുകയും ചെയ്‌താൽ ഇന്ത്യക്ക് സെമി കളിക്കാം. അഫ്ഗാനിസ്ഥാൻ ന്യൂസിലന്‍റിനെ 10 റൺസിനു തോൽപിച്ചാൽ, കുറഞ്ഞത് രണ്ട് റൺസിനെങ്കിലും നമീബിയയെ തോൽപിച്ചാൽ ഇന്ത്യയ്ക്ക് സെമിയിലെത്താം. 

വാട്‌സാപ്പ് ഗ്രൂപ്പിൽ അംഗമാകുവാൻ

https://chat.whatsapp.com/IjXOK79vV0mB3M4eg0HiVJ

മുല്ലപ്പെരിയാർ ജലനിരപ്പ് 152 അടിയാക്കുമെന്ന് തമിഴ്നാട് 

കുമളി: മുല്ലപ്പെരിയാർ അണക്കെട്ടിലെ ജലനിരപ്പ് 152 അടിയാക്കി ഉയർത്തുമെന്ന് തമിഴ്‌നാട്. കോടതി നിർദേശിച്ച ബേബി ഡാം ബലപ്പെടുത്തൽ നടപടികൾ പൂർത്തിയാക്കിയ ശേഷം ഇക്കാര്യത്തിൽ നടപടിയെടുക്കുമെന്ന് തമിഴ്‌നാട് ജലസ്വേചന മന്ത്രി ദുരൈമുരുഗൻ പറഞ്ഞു. മുല്ലപ്പെരിയാർ അണക്കെട്ടിൽ സന്ദർശനം നടത്തിയ ശേഷമാണ് അദ്ദേഹം ഇക്കാര്യം അറിയിച്ചത്. 

ബേബി ഡാം ബലപ്പെടുത്തുന്നതിനായി ഇതിനു താഴെയുള്ള മൂന്ന് മരങ്ങൾ വെട്ടണം. ഇതിനു കേരളം അനുമതി നൽകണമെന്നും മന്ത്രി ആവശ്യപ്പെട്ടു.  പിണറായി സർക്കാർ അധികാരത്തിലിരിക്കുമ്പോൾ മുല്ലപ്പെരിയാർ പ്രശ്നത്തിന് പരിഹാരം കാണാൻ കഴിയുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു. മുല്ലപ്പെരിയാർ അണക്കെട്ടിന്റെ സ്പിൽവേ ഷട്ടറുകൾ തുറന്നതിനെതിരെ തമിഴ്നാട്ടിൽ എഐഡിഎംകെ അടക്കമുള്ള പ്രതിപക്ഷ പാർട്ടികൾ രംഗത്തെത്തിയിരുന്നു. 

തമിഴ്നാട്ടിലെ ജനങ്ങളുടെ ബുദ്ധിമുട്ടുകൾ പരിഗണിക്കാതെയാണ് ഡിഎംകെ സർക്കാർ അണക്കെട്ട് തുറക്കാൻ തീരുമാനിച്ചതെന്നായിരുന്നു എഐഡിഎംകെയുടെ ആരോപണം. അണക്കെട്ടിലെ ജലനിരപ്പ് 142 അടിയിൽ നിന്നും 136 അടിയലേക്ക് താഴ്ത്തണമെന്ന് കേരളം ആവശ്യപ്പെടുന്നതിനിടെയാണ് തമിഴ്നാട് മന്ത്രിയുടെ പ്രസ്താവന. തമിഴ്നാട്ടിലെ അഞ്ചംഗ മന്ത്രിതല സംഘമാണ് ഇന്ന് മുല്ലപ്പെരിയാർ സന്ദർശിച്ചത്. മന്ത്രി ദുരൈമുരുകനൊപ്പം സഹകരണം, ധനകാര്യം, വാണിജ്യനികുതി, ഭക്ഷ്യ സിവിൽ സപ്ലൈസ് മന്ത്രിമാരാണ് മുല്ലപ്പെരിയാറിലെത്തിയത്. ഇവർക്കൊപ്പം ഏഴോളം എംഎൽഎമാരും സ്ഥലം സന്ദർശിച്ചു.