ഷൂസ് ഊരില്ലെന്ന് വരൻ; കെട്ടിയ താലി ഊരി നൽകി വധു

കടയ്ക്കൽ: നിലവിളക്കിനെ ചൊല്ലിയുള്ള തർക്കത്തിനിടെ വിവാഹ വേദിയിൽ കെട്ടി താലി വരന് ഊരി നൽകി വധു മറ്റൊരാളെ വിവാഹം കഴിച്ചു. കടയ്ക്കൽ ആൽത്തറമൂട് ഓഡിറ്റോറിയത്തിലായിരുന്നു സംഭവം. ആൽത്തറമൂട് സ്വദേശിയായ പെൺകുട്ടിയും കിളിമാനൂർ പുളിമാത്ത് സ്വദേശിയായ യുവാവും തമ്മിലുള്ള വിവാഹവേദിയിലായിരുന്നു നാടകീയ രംഗങ്ങൾ. 

താലികെട്ടിന് ഹാളിലെത്തിയതിനു പിന്നാലെ വിവാഹ വേദിയിൽ നിലവിളക്ക് പാടില്ലെന്ന് വരൻ വാശി പിടിച്ചു. കീഴ്‌വഴക്കങ്ങൾ മാറ്റാനാവില്ലെന്ന നിലപാടിലായിരുന്നു വധുവും കുടുംബവും. ഇതോടെ തർക്കം ഉടലെടുത്തു. ഇതിനിടെ വേദിയിൽ ഷൂസ് ഊരാൻ കഴിയില്ലെന്നായി വരൻ. ഇതോടെ വാക്ക് തർക്കം സംഘർഷത്തിലേക്ക് നീങ്ങി. പിന്നീട് മുതിർന്നവർ ഇടപെട്ട് വേദിക്ക് പുറത്ത് താലികെട്ട് നടത്തി.  

എന്നാൽ താലികെട്ട് കഴിഞ്ഞും വരനും വധുവും തമ്മിൽ തർക്കമായി. ഇതിനിടെ തർക്കം വരന്‍റെയും വധുവിന്‍റെയും വീട്ടുകാരിലേക്കും നീണ്ടു. ഇതിനിടെ പെൺകുട്ടിയുടെ ബന്ധുക്കൾ പൊലീസിൽ പരാതിയും നൽകി. ഇതിനു പിന്നാലെ വധു കെട്ടിയ താലി അഴിച്ച് വരന് നൽകി. തുടർന്ന് വിവാദമായ അതേ വേദിയിൽ വച്ച് വധു ബന്ധുവായ മറ്റൊരു യുവാവിനെ വിവാഹം കഴിക്കുകയായിരുന്നു. 

വാട്‌സാപ്പ് ഗ്രൂപ്പിൽ അംഗമാകുവാൻ

https://chat.whatsapp.com/HN3zUlGc2Va9613524dFBp

പെരുമഴ; ഇടുക്കി, മുല്ലപ്പെരിയാർ അണക്കെട്ടിലേക്ക് നീരൊഴുക്ക് കൂടി 

ഇടുക്കി: ഹൈറേഞ്ച് മേഖലയിൽ വീണ്ടും ശക്തമായ മഴ. ശനിയാഴ്ച്ച രാവിലെ ഇടുക്കി, മുല്ലപ്പെരിയാർ അണക്കെട്ടുകളുടെ വൃഷ്‌ടി പ്രദേശത്ത് തെളിച്ചം ഉണ്ടായിരുന്നെങ്കിലും പകൽ 11 ഓടെ മഴ തുടങ്ങുകയായിരുന്നു. മുല്ലപ്പെരിയാർ, ഇടുക്കി അണക്കെട്ടുകളിൽ ജലനിരപ്പ് ഉയർന്നുകൊണ്ടിരിക്കുന്ന സാഹചര്യത്തിൽ ആശങ്ക വർധിച്ചിട്ടുണ്ട്. 

ജലനിരപ്പ് ഉയർന്നാൽ ഇടുക്കി അണക്കെട്ട് തുറക്കുമെന്നും പെരിയാർ തീരത്തുള്ളവർ ജാഗ്രത പാലിക്കണമെന്നും ജില്ലാ ഭരണകൂടം ഇന്നലെ അറിയിച്ചിരുന്നു. എന്നാൽ ഇന്നു രാവിലെ മഴ മാറി നിന്നതോടെ ഇതിന്‍റെ ആവശ്യം വരില്ലെന്നായിരുന്നു വിലയിരുത്തൽ. ഇപ്പോൾ മഴ ശക്തമായി തുടങ്ങിയതോടെ അണക്കെട്ടിലേക്കുള്ള നീരൊഴുക്കും വൈകിട്ടോടെ വർധിക്കാൻ ഇടയാക്കിയേക്കും. ഇന്ന് രാവിലെ 10ന് അണക്കെട്ടിലെ ജലനിരപ്പ് 2398.48 അടിയിലെത്തി. റൂൾ കർവ് പ്രകാരം ഇടുക്കി ഡാമിലെ ബ്ലൂ അലർട്ട് ലെവൽ 2392.03 അടിയാണ്. 

ഓറഞ്ച് അലർട്ട് 2398.03 അടിയും റെഡ് അലർട്ട് 2399.03 അടിയുമാണ്. നിലവിൽ അണക്കെട്ടിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. അതേസമയം മുല്ലപ്പെരിയാർ അണക്കെട്ടിലും ജലനിരപ്പ് കുതിച്ചുയരുകയാണ്. തമിഴ്‌നാട് കൊണ്ടുപോകുന്ന വെള്ളത്തിന്‍റെ അളവ് കുറച്ചതോടെയാണ് മുല്ലപ്പെരിയാറിൽ ജലനിരപ്പ് ഉയർന്നു തുടങ്ങിയത്. ഇന്ന് രാവിലെ 10ന് 139.40 അടിയാണ് അണക്കെട്ടിലെ ജലനിരപ്പ്. മഴ ശക്തമായതോടെ അണക്കെട്ടിൽ ജലനിരപ്പ് ഉയരുമോയെന്ന ഭീതി ഉയരുന്നുണ്ട്.