ചീപ്പ് എടുത്ത് ഒന്ന് ചീകിയാൽ മുടി കൊഴിഞ്ഞ് പോരുന്നതിനോളം വിഷമം മറ്റൊന്നിനും ഉണ്ടാകില്ല. പുരുഷൻമാരെയും സ്ത്രീകളെയും ഒരുപോലെ അലട്ടുന്ന ഒരു പ്രശ്നമാണ് മുടി കൊഴിച്ചിൽ.
മുടിയുടെ ആരോഗ്യക്കുറവ് തന്നെയാണ് മുടി കൊഴിച്ചിലിനു പ്രധാന കാരണമാകുന്നത്. അതല്ലെങ്കിൽ ഒരു പക്ഷെ നമ്മുടെ പതിവായുള്ള കേശ സംരക്ഷണ രീതികൾ മികച്ചതല്ലാത്തതിനാലാകാം ഇങ്ങനെ സംഭവിക്കുന്നത്. രാസവസ്‌തുക്കൾ അടങ്ങിയ കേശസംരക്ഷണ ഉൽപ്പന്നങ്ങളുടെ പാർശ്വഫലങ്ങളും മുടികൊഴിച്ചിലിനു കാരണമാകാറുണ്ട്.
മുടി കൊഴിച്ചലിന് പിന്നിൽ
നിങ്ങളുടെ ദൈനംദിന ശീലങ്ങ, നിങ്ങൾ പിന്തുടരുന്ന ഭക്ഷണക്രമം, നിങ്ങൾ താമസിക്കുന്ന കാലാവസ്ഥ തുടങ്ങിയ കാര്യങ്ങൾ മുടികൊഴിച്ചിലിനു കാരണമായി ഉൾപ്പെടാം. അതുപോലെ തന്നെ മറ്റു ചില കരണങ്ങളായ സമ്മർദ്ദം, മോശം കേശ സംരക്ഷണം, മുടിയിൽ നിങ്ങൾ ഉപയോഗിക്കുന്ന ഉൽപ്പന്നങ്ങൾ, ഹോർമോൺ അളവ്, നിങ്ങളുടെ ആന്തരിക ആരോഗ്യ തുടങ്ങിയ കാര്യങ്ങളും ഇതിൽ സ്വാധീനം ചെലുത്തുന്നതാണ്.
പാരമ്പര്യം ഒരു പ്രധാന ഘടകമാണ്. മുടി കൊഴിച്ചിലിന് കാരണമാകുന്ന അലോപ്പിഷ്യ, ല്യൂപ്പസ്, തൈറോയിഡ് പ്രശ്‌നങ്ങൾ പോലുള്ളവ പാരമ്പര്യവുമായി ബന്ധപ്പെട്ട് നിൽകുന്നു.
കൊഴിച്ചിൽ തടഞ്ഞ് മുടി തഴച്ച് വളരാൻ
മുടി കൊഴിച്ചിൽ നിയന്ത്രിച്ചു നിർത്താനും മുടി വളർച്ചയെ പ്രോത്സാഹിപ്പിക്കാനും ശ്രമിക്കുകയാണെങ്കിൽ ഇതിന് ഏറ്റവും ആദ്യം ചെയ്യേണ്ട കാര്യം മുടിയുടെ ഗുണനിലവാരവും ആരോഗ്യവും മെച്ചപ്പെടുത്തുകയാണ്. ഇതിനായി പ്രകൃതിദത്ത പരിഹാരങ്ങളെക്കാൾ മികച്ച മറ്റൊന്നില്ല എന്ന് പറയാം.
വെളിച്ചെണ്ണ
നമ്മുടെ നാട്ടിൽ സുലഭമായി ലഭിക്കുന്ന നാളികേരത്തിന് നിങ്ങളുടെ തലമുടിയുടെ പ്രശ്‌നങ്ങളെ ഒരു പരിധിവരെ നിയന്ത്രിച്ചു നിർത്താനുള്ള ഗുണങ്ങളുണ്ട്. ഇത് മുടിക്ക് ആവശ്യമായ പോഷകങ്ങൾ നൽകികൊണ്ട് വളർച്ചെയ്‌ പ്രോത്സാഹിപ്പിക്കുന്നു. നാളികേരത്തിൽ ആവശ്യ കൊഴുപ്പുകൾ, പലതരം ധാതുക്കൾ, പ്രോടീൻ എന്നിവയെല്ലാം അടങ്ങിയിട്ടുണ്ട്. ഇതിന്‍റെ ഉപയോഗം മുടി പൊട്ടുന്നത് കുറയ്ക്കാൻ സഹായിക്കുന്നു.
കൂടാതെ പൊട്ടാസ്യം, അയൺ എന്നിവയും ദാരാളം അടങ്ങിയിട്ടുണ്ട്. മുടി കൊഴിച്ചിൽ തടയാനായി വെളിച്ചെണ്ണ അല്ലെങ്കിൽ തേങ്ങാപ്പാലോ തലമുടിയിൽ ഉപയോഗിക്കാം. തലമുടി തേങ്ങാപ്പാൽ ഉപയോഗിച്ച് കഴുകുന്നത് മുടിയെ പരിപോഷിപ്പിക്കാൻ സഹായിക്കും. അതുപോലെ വെളിച്ചെണ്ണ ഉപയോഗിച്ച് ഇടയ്ക്കിടെ മുടി മസാജ് ചെയ്യുന്നത് തലയോട്ടിയിലേക്കുള്ള രക്തചക്രമണം വർധിപ്പിച്ചുകൊണ്ട് മുടി വളർച്ചയെ പ്രോത്സാഹിപ്പിക്കുകയും ചെയ്യും.
നെല്ലിക്ക
മുടി കൊഴിച്ചിൽ ലക്ഷണങ്ങൾ നേരിടുന്ന ആളുകൾക്ക് ഫലപ്രദമാണ് നെല്ലിക്ക. ആയുർവേദത്തിൽ പണ്ടുമുതക്കെ കേശ പരിപാലനത്തിനായി ഉപയോഗിച്ച് വരുന്ന ഒരു ചേരുവയാണിത്. മുടിവളർച്ചയെ പ്രോത്സാഹിപ്പിക്കുന്ന വിറ്റാമിൻ സി, ആന്‍റി ഓക്സിഡൻറുകൾ എന്നിവയാൽ നിറഞ്ഞിരിക്കുന്ന ഇത് മുടികൊഴിച്ചിൽ ലക്ഷണങ്ങൾ പ്രാരംഭ ഘട്ടത്തിലാണെങ്കിൽ അതിനെ പ്രതിരോധിക്കാൻ സഹായകമാണ്.
നെല്ലിക്ക ഉണക്കിപ്പൊടിച്ചത് നിങ്ങൾക്ക് കടകളിൽ നിന്നും വാങ്ങുവാൻ സാധിക്കും. ഇത് പതിവായി തലമുടിയിൽ പ്രയോഗിച്ച് കുറച്ചുനേരം സൂക്ഷിച്ച് കഴുകിക്കളയുന്നത് ഈ പ്രശ്നത്തിന് ഒരു പരിഹാരം നൽകും.
കറ്റാർവാഴ
നമ്മുടെ വീട്ടുമുറ്റത്ത് ഏറ്റവും എളുപ്പത്തിൽ വച്ചുപിടിപ്പിക്കാൻ കഴിയുന്ന ചെടികളിൽ ഒന്നാണ് കറ്റാർവാഴ. ചർമത്തിന്‍റെ ആരോഗ്യത്തിനും അതോടൊപ്പം മുടിയുടെ വളർച്ചയ്ക്കും സഹായകമായ ഒട്ടനവധി പോഷകങ്ങളെ നൽകാൻ ഇതിനു കഴിവുണ്ട്.
പ്രോട്ടിയോലൈറ്റിക്ക് എൻസൈമുകൾ ഉള്ള കറ്റാർവാഴ നിങ്ങളുടെ മുടി വളർച്ച വേഗത്തിലാക്കാൻ സഹായിക്കുന്നു. കറ്റാർവാഴയുടെ പതിവായ ഉപയോഗം താരൻ ഗണ്യമായി കുറയ്ക്കുന്നതിനും ചൊറിച്ചിൽ അടക്കമുള്ള തലയോട്ടിയിലെ പ്രശ്‌നങ്ങളെ ഒഴിവാക്കാനും സഹായിക്കുന്ന ഒന്നാണ്. നിങ്ങൾക്ക് ഉപയോഗിക്കുന്ന ഹെയർ ഓയിലിൽ കുറച്ച് കറ്റാർവാഴ നീര് കലർത്തി മുടിയിൽ പ്രയോഗിക്കാം.
സവാള നീര്
കേൾക്കുമ്പോൾ പലർക്കും അൽപം വിചിത്രമായി തോന്നുമെങ്കിലും വാസ്‌തവത്തിൽ സവാള നീര് നിങ്ങളുടെ മുടിയുടെ ആരോഗ്യത്തെ പരിപോഷിപ്പിച്ചുകൊണ്ടു വളർച്ചയെ ഉത്തേജിപ്പിക്കുന്ന ഒന്നാണ്. ഒരു ടേബിൾ സ്‌പൂൺ അസംസ്‌കൃത സവാള ജ്യൂസ് അല്ലാതെ മറ്റു ചേരുവകൾ ഒന്നും തന്നെ നിങ്ങൾക്ക് ഇതിനായി ആവശ്യമായി വരില്ല.
അരിഞ്ഞെടുത്ത സവാള ഒരു മിക്‌സറിൽ ഇട്ട് നന്നായി അരച്ചെടുക്കുക. ഇപ്പോൾ വിരൽത്തുമ്പുകൾ ഉപയോഗിച്ച് സവാള നീര് തലയോട്ടിയിലുടനീളം മസാജ് ചെയ്യുക. കുറച്ച് നേരം ഇത് തലയിൽ സൂക്ഷിച്ച ശേഷം സൾഫേറ്റ് രഹിതമായ ഏതെങ്കിലും ഒരു ഷാംപൂ ഉപയോഗിച്ചു ചെറുചൂടുള്ള വെള്ളത്തിൽ കഴുകുക.
ചെമ്പരത്തി
കേശ പരിപാലനത്തിനായി പണ്ട് മുതൽക്കേ സ്ത്രീകൾ ഉപയോഗിച്ച് വരുന്ന പരിഹാര മാർഗങ്ങളിൽ ഒന്നാണ് ചെമ്പരത്തി. മുടിക്ക് അഴകും ആരോഗ്യവും നൽകാനും വളർച്ചയെ ഉത്തേജിപ്പിക്കാനും അകാല നരയെ തടയാനും താരനെ ചികിൽസിക്കാനും എല്ലാം ഇതിന്‍റെ ഉപയോഗം സഹായിക്കുന്നു.
മുടി കൊഴിച്ചിലിനെ നിയന്ത്രിച്ചു നിർത്തുന്നതിന് സഹായകമായ ഒട്ടേറെ പോഷകങ്ങൾ ചെമ്പരത്തിയിൽ നിറഞ്ഞിരിക്കുന്നു. ഒരു ഹെയർ മാസ്‌കിന്‍റെ രൂപത്തിൽ നിങ്ങൾക്ക് ഇത് തലമുടിയിലും തലയോട്ടിയിലും പ്രയോഗിക്കാം.
മുട്ടയുടെ മഞ്ഞ
മുട്ടയുടെ മഞ്ഞ നിങ്ങളുടെ തലമുടിയിൽ അത്ഭുതങ്ങൾ സൃഷ്‌ടിക്കാൻ ശേഷിയുള്ള ഒരു ചേരുവയാണ്. മുടികൊഴിച്ചിൽ നിയന്ത്രിച്ചു നിർത്താൻ കഴിയുന്ന നിരവധി പോഷകഘടകങ്ങൾ മുട്ടയിലുണ്ട്. സൾഫറിന്‍റെ സമൃദ്ധമായ സ്രോതസായ ഫോസ്ഫറസ്, സെലിനിയം, അയോഡിൻ, സിങ്ക്, പ്രോട്ടീൻ എന്നിവ കൊണ്ട് നിറഞ്ഞിരിക്കുന്നു ഇവ.
ഇവയെല്ലാം മുടിയുടെ വളർച്ചയെ പ്രോത്സാഹിപ്പിക്കുന്നതിന് സഹായകമാണ്. മുട്ടയുടെ മഞ്ഞ മാത്രം വേർതിരിച്ചെടുത്തത് നന്നായി അടിച്ചെടുത്ത് തലയോട്ടിയിൽ നേരിട്ട് പുരട്ടാം. ഇത് മുടിയിൽ പ്രയോഗിച്ച് 20 മിനിറ്റ് സൂക്ഷിക്കുക. അതിനുശേഷം തണുത്ത വെള്ളത്തിൽ കഴുകുക. കഴുകി കളയുമ്പോൾ മുടിയിൽ ഷാംപൂ ചെയ്യാൻ മറക്കരുത്. അല്ലെങ്കിൽ ഇത് മുടിക്ക് രൂക്ഷമായ ഗന്ധം ഉണ്ടാകുന്നതിന് കാരണമായേക്കാം.
തൈര്
പ്രോബയോട്ടിക്‌സിൽ ഗുണങ്ങളാൽ നിറഞ്ഞ തൈര് രോമകൂപങ്ങളെ ഉത്തേജിപ്പിക്കുന്നതിന് മികച്ചതാണ്. മുടികൊഴിച്ചിൽ ലക്ഷണങ്ങളെ നിയന്ത്രിച്ച് നിർത്തുന്ന കാര്യത്തിൽ വളരെയധികം ഗുണം ചെയ്യാൻ കഴിയുന്ന ഈ ലളിതമായ ചേരുവ ഏതൊരു ഹെയർ മാസ്‌കിനോടൊപ്പവും ചേർത്ത് വളരെ എളുപ്പത്തിൽ നിങ്ങൾക്ക് ഉപയോഗിക്കാം.
ശ്രദ്ധിക്കേണ്ട മറ്റു കാര്യങ്ങൾ
- മുടി കഠിനമായ രീതിയിൽ ചീകുന്നത് ഒഴിവാക്കുക.
- മാനസിക സമ്മർദ്ദ നില എപ്പോഴും നിയന്ത്രണത്തിലാക്കി വയ്ക്കുക. കാരണം സമ്മർദ്ദം മുടി കൊഴിച്ചിലിന് കാരണമാകുന്ന പ്രധാന പ്രശ്നമാണ്.
- നിങ്ങളുടെ കേശ സംരക്ഷണ ഉൽപ്പന്നങ്ങളിൽ കഴിവതും രാസവസ്‌തുക്കളും സൾഫേറ്റുകളും അടങ്ങിയിരിക്കുന്നവ ഒഴിവാക്കുക.
- നിങ്ങളുടെ തലമുടിയിൽ വളരെ ചൂടുള്ളതോ അല്ലെങ്കിൽ വളരെ തണുത്തതോ ആയ വെള്ളം ഉപയോഗിക്കരുത്.
- നല്ല നിലവാരമുള്ള രാസവസ്‌തു രഹിതമായ ഷാംപൂവുകൾ മാത്രം ഉപയോഗിക്കുക.
വാട്സാപ്പ് ഗ്രൂപ്പിൽ അംഗമാകാൻ ലിങ്ക് ക്ലിക്ക് ചെയ്യുമല്ലോ..
Post A Comment: