ഇടുക്കി: ടി.പി.ആർ നിരക്ക് കുത്തനെ ഉയർന്നതോടെ ഉപ്പുതറ- അയ്യപ്പൻകോവിൽ പഞ്ചായത്തുകളിൽ ആശങ്ക. ഉപ്പുതറ പഞ്ചായത്ത് നിലവിൽ സി കാറ്റഗറിയിലും അയ്യപ്പൻകോവിൽ പഞ്ചായത്ത് ഡി കാറ്റഗറിയിലുമാണ്. ഉപ്പുതറ പഞ്ചായത്തിൽ മൂന്ന് വാർഡുകൾ കേന്ദ്രീകരിച്ചാണ് രോഗ വ്യാപനം രൂക്ഷമായിരിക്കുന്നത്.
അയ്യപ്പൻകോവിൽ പഞ്ചായത്തിൽ തോട്ടം മേഖലയിലാണ് രോഗ വ്യാപനം രൂക്ഷമായിരിക്കുന്നത്. രോഗ വ്യാപനം രൂക്ഷമായി തുടരുന്ന സാഹചര്യത്തിൽ ഉപ്പുതറ പഞ്ചായത്തിൽ തിങ്കളാഴ്ച്ച സർവകക്ഷി യോഗം വിളിച്ചിട്ടുണ്ട്. രണ്ടാഴ്ചയായി ഉപ്പുതറ പഞ്ചായത്തിലെ ടെസ്റ്റ് പോസറ്റിവിറ്റി നിരക്ക് 11 ശതമാനത്തിന് മുകളിലാണ്.
ഓരോദിവസവും രോഗികളുടെ എണ്ണം വർധിക്കുന്ന സാഹചര്യത്തിലാണ് സർവകക്ഷി യോഗം വിളിച്ചിരിക്കുന്നത്. തുടർച്ചയായി പഞ്ചായത്ത് സി കാറ്റഗറിയിൽ തുടരുന്നത് ജനജീവിതം ദുസഹമാക്കിയിരിക്കുകയാണ്. വ്യാപാര സ്ഥാപനങ്ങൾ അടഞ്ഞു കിടക്കുകയാണ്. പ്രദേശവാസികൾക്ക് ജോലിക്ക് പോകാനും കഴിയാത്ത സ്ഥിതിയായി. ഇതിനിടെ പുറത്തിറങ്ങുന്നവരെ പെറ്റിയിൽ കുടുക്കാൻ പൊലീസും ശ്രമം നടത്തുന്നുണ്ട്.
അയ്യപ്പൻകോവിൽ പഞ്ചായത്തിൽ തൊഴിലുറപ്പ് പണിക്കാർക്കിടയിലും തോട്ടം തൊഴിലാളികൾക്കിടയിലുമാണ് രോഗ വ്യാപനം. തോട്ടം തൊഴിലാളികളിൽ ചിലർക്ക് കോവിഡ് കണ്ടെത്തിയതോടെ പണികൾ നിർത്തി വച്ചിരിക്കുകയാണ്. തൊഴിലാളികളെ പരിശോധനയ്ക്ക് വിധേയമാക്കിയ ശേഷമായിരിക്കും പണികൾ ആരംഭിക്കുക. ദൈനംദിന വരുമാനത്തിൽ ജീവിക്കുന്ന നിരവധി പേർ ഇതോടെ തൊഴിലില്ലാതെ ദുരിതത്തിലായിരിക്കുകയാണ്. ആശുപത്രി ആവശ്യങ്ങൾക്ക് പോലും മാർഗമില്ലാത്തതാണ് നിലവിലെ സ്ഥിതി.
വാട്‌സാപ്പ് ഗ്രൂപ്പിൽ അംഗമാകുവാൻ
Post A Comment: