കൊച്ചി: നിയന്ത്രണങ്ങൾക്കിടയിൽ ആഘോഷങ്ങളില്ലെങ്കിലും പ്രിയതാരം മോഹൻലാലിന് 60-ാം പിറന്നാൾ ആശംസകൾ നേർന്ന് സിനിമാ ലോകം. ചെന്നൈയിലെ വീട്ടിലാണ് മോഹൻലാൽ. പിറന്നാളിന് കൊച്ചിയിൽ അമ്മയൊടൊപ്പം എത്തണമെന്ന് ആഗ്രഹിച്ചെങ്കിലും ലോക് ഡൗൺ തടസമായി. സോഷ്യൽ മീഡിയയിലൂടെ പ്രിയ നടന് ആശംസയർപ്പിച്ച് ആരാധകരും സജീവമായിട്ടുണ്ട്. പ്രമുഖ താരങ്ങളും രാഷ്ട്രീയ സാമൂഹിക നേതാക്കളും ലാലേട്ടന് ആശംസയുമായി എത്തിയിട്ടുണ്ട്.
നാല് പതിറ്റാണ്ടോളമായി മലയാള സിനിമയുടെ നിറ സാനിധ്യമാണ് മോഹൻലാൽ. തിരനോട്ടം എന്ന സിനിമയിലൂട എത്തിയ ലാൽ പിന്നീട് മലയാളികളുടെ കുടുംബാഗമായി മാറുകയായിരുന്നു. തിരനോട്ടത്തിലെ കുട്ടപ്പന് സൈക്കിൾ ബാലൻസ് അത്ര വശമായിരുന്നില്ല. മോഹൻലാലിൻറയും തലസ്ഥാനത്തെ ഒരു കൂട്ടം സുഹൃത്തുക്കളുടെയും ആദ്യ സിനിമാ യാത്രക്ക് ഉണ്ടായത് ഒരുപാട് തടസങ്ങൾ. പക്ഷെ 78 ൽ വിറച്ച് വിറച്ച് സൈക്കിളോടിച്ച ലാലിന്‍റെ അസാധാരണ കുതിപ്പാണ് പിന്നെ മലയാള സിനിമയും ഇന്ത്യൻ സിനിമയും കണ്ടത്.
മഞ്ഞിൽ വിരിഞ്ഞ പൂക്കൾ മോഹൻലാലിന്‍റെയും മലയാള സിനിമയുടേയും തലവരമാറ്റി. ഷാളും കൂളിങ് ഗ്ലാസുമണിഞ്ഞെത്തിയ വില്ലൻ പിന്നെ മെല്ലെ മെല്ലെ നായകനായും താരമായും സൂപ്പർതാരമായും ആയുള്ള വേഷപ്പകർച്ച. മലയാള സിനിമയുടെ സുവ‍ർണ്ണകാലമെന്ന് അടയാളപ്പെടുത്തുന്ന എൺപതുകളിലും 90 കളിലും പുറത്ത് വന്ന എണ്ണം പറഞ്ഞ ചിത്രങ്ങൾ ലാലിലെ മഹാനടനെ കാണിച്ചുതന്നു.
മികച്ച നടനുള്ള രണ്ട് പുരസ്ക്കാരങ്ങളടക്കം നാലു ദേശീയ അവാർഡുകൾ. 9 സംസ്ഥാന ബഹുമതികൾ. പത്മശ്രീ, പത്മഭൂഷൻ എന്നിങ്ങനെ നേടിയ അംഗീകാരങ്ങളേറെ.. മുന്നൂറിലേറെ വേഷങ്ങൾ പിന്നിട്ട് അറുപതിന്‍റെ നിറവിലെത്തിയ പ്രിയനടനിൽ നിന്നും ആരാധകർ ഇനിയുമേറെ പ്രതീക്ഷിക്കുന്നു. മരക്കാർ അറബിക്കടലിൻറെ സിംഹം, ദൃശ്യം 2 , സംവിധായകന്റെ റോളിൽ ആദ്യമായി എത്തുന്ന ബാറോസ് .. വരാനുള്ളതും ഇന്ദ്രജാലങ്ങൾ...
വാട്സാപ്പ് ഗ്രൂപ്പിൽ അംഗമാകുവാൻ ഈ ലിങ്ക് ക്ലിക്ക് ചെയ്യുമല്ലോ..
ഫെയ്സ് ബുക്ക് പേജിനായുള്ള ലിങ്ക് ചുവടെ
Post A Comment: