മോഷ്ടിക്കാൻ കയറിയ വീട്ടിൽ എസിയിട്ട് സുഖമായി കിടന്നുറങ്ങിയ കള്ളനെ പൊലീസ് കൈയോടെ പിടികൂടി. തായ്ലാൻഡിലാണ് രസകരമായ സംഭവം നടന്നത്. ഇവിടുത്തെ ഫെച്ചാബൂൺ പ്രവിശ്യയിലെ വിച്ചിയാൻ ബുരിയിലാണ് മോഷ്ടാവിന് ലോക അമ്മളി പിണഞ്ഞത്. പൊലീസ് ഉദ്യോഗസ്ഥനായ ജിയാം പ്രസേർട്ടിന്റെ വീട്ടിലാണു 22കാരനായ കള്ളൻ മോഷണത്തിന് എത്തിയത്.
ജിയാം ഉറങ്ങുന്ന സമയത്ത് ടൂൾകിറ്റ് ഉപയോഗിച്ച് വാതിൽ തുറന്ന് ഇയാൾ അകത്തു കയറി. ജിയാമിന്റെ മകളുടെ മുറിയിലാണു മോഷ്ടാവ് ആദ്യം പ്രവേശിച്ചത്. റൂമിൽ കിടക്കയും എസിയും കണ്ടപ്പോൾ കുറച്ചു സമയം വിശ്രമിച്ചശേഷം മോഷണം തുടരാമെന്നു കരുതി. എന്നാൽ വിശ്രമം സുഖനിദ്രയായി. രാവിലെ ഉണർന്നപ്പോഴാണു മകളുടെ മുറിയിൽ എസി പ്രവർത്തിക്കുന്ന ശബ്ദം ജിയാം കേൾക്കുന്നത്.
കുറച്ചു ദിവസമായി മകൾ വീട്ടിലില്ല. പിന്നെ എങ്ങനെയാണ് എസി പ്രവർത്തിക്കുന്നതെന്നു പരിശോധിക്കാൻ എത്തിയപ്പോഴാണ് ഒരാൾ മുറിയിൽ കിടന്നുറങ്ങുന്നതായി കണ്ടത്. തുടർന്ന് സഹപ്രവർത്തകരെ വിളിച്ചു വരുത്തുകയായിരുന്നു.
പുതച്ചു മൂടി കിടന്നുറങ്ങുന്ന മോഷ്ടാവിനെ വിളിച്ചുണർത്തുന്നതും ഇയാൾ അമ്പരന്ന് നോക്കുന്നതും പൊലീസ് പങ്കുവച്ച വിഡിയോയിലുണ്ട്. മോഷണം, അതിക്രമിച്ചു കടക്കൽ എന്നീ കുറ്റങ്ങൾ ചുമത്തിയാണ് ഇയാൾക്കെതിരെ കേസെടുത്തിരിക്കുന്നത്. എന്തായാലും സംഭവം തായ്ലാൻഡിൽ വലിയ ചർച്ചയായിരിക്കുകയാണ്.
വാട്സാപ്പ് ഗ്രൂപ്പിൽ അംഗമാകുവാൻ
Post A Comment: