തേച്ചിട്ടു പോയ കാമുകിയുടെ വിവാഹ വേദിയിലേക്ക് പെൺവേഷം കെട്ടി കാമുകന്‍റെ എൻട്രി. ഉത്തർപ്രദേശിലെ ബഡോഹി ജില്ലയിലാണ് കല്യാണ വീട്ടിൽ പെൺവേഷം കെട്ടിയെത്തിയ കാമുകനെ കൈയോടെ പൊക്കിയത്. തന്‍റെ കാമുകി വേറൊരു വിവാഹം കഴിക്കാൻ ഒരുങ്ങുന്നുവെന്നറിഞ്ഞതോടെയാണ് കാമുകൻ ഇത്തരം ഒരു സാഹസത്തിനു മുതിർന്നത്.
കാമുകിയുടെ വിവാഹ ഒരുക്കങ്ങൾ നടക്കുന്ന വീട്ടിലേക്ക് നവവധുവിന്‍റെ വേഷത്തിലാണ് കാമുകൻ എത്തിയത്. വിവാഹത്തിന് അണിഞ്ഞൊരുങ്ങുന്നതു പോലെ മുടി വെച്ച്, മേക്കപ്പ് ഇട്ട് തോളിൽ ഒരു പഴ്സും, ചുവപ്പ് സാരിയും ചെരിപ്പുമണിഞ്ഞാണ് ഇയാൾ എത്തിയത്. ഇയാളുടെ കൂട്ടുകാരും ഒപ്പമുണ്ടായിരുന്നു.
വീടിനുള്ളിൽ കയറിപ്പറ്റിയ ഇയാൾ മുഖം മറച്ചിരുന്നു. വധുവിനെ കാണണമെന്ന് ആവശ്യപ്പെട്ടതോടെ വീട്ടുകാർക്ക് വന്നിരിക്കുന്നത് ആരാണെന്ന സംശയം ഉടലെടുക്കുകയായിരുന്നു. മുഖം മറച്ചിരിക്കുന്നത് കൂടി ശ്രദ്ധയിൽപെട്ടതോടെയാണ് സംശയം ബലപ്പെട്ടത്. ഇതോടെ നാടകം പൊളിഞ്ഞു. വിവാഹത്തിന് എത്തിയവർ ഇയാളെ പിടികൂടി. മുഖം മറച്ചിരുന്ന തുണി മാറ്റിയപ്പോൾ വെച്ചുകെട്ടിയ മുടിയും അഴിഞ്ഞുവീണു.
ഇതോടെ ഒരു പുരുഷനാണ് സ്ത്രീവേഷത്തിലെത്തിയതെന്ന് അവിടെ കൂടിയവർക്ക് മനസ്സിലായി. ബന്ധുക്കൾ പൊലീസിൽ അറിയാൻ ശ്രമിച്ചപ്പോഴേക്കും കാമുകനും കൂട്ടുകാരും ഓടി രക്ഷപെട്ടു. എന്തായാലും സംഭവം വധുവിന്‍റെ വീട്ടുകാർ പൊലീസിനെ അറിയിച്ചിട്ടില്ല. എന്നാൽ പെൺവേഷം കെട്ടിയെത്തിയ കാമുകന്‍റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
വാട്‌സാപ്പ് ഗ്രൂപ്പിൽ അംഗമാകുവാൻ
Post A Comment: